اسلام آباد۔ 29 مارچ (اے پی پی) وزیراعظم عمران خان اقوام متحدہ نا چاگڑدی پروگرام (یو این ای پی ) نا کنڈآن چاگڑدی نظام نا بحالی ٹی پاکستان نا اہم کڑد انا اعتراف آ ٹی بلین ٹری سونامی پروگرام نا سرسہبی کن تینا ٹیم انا کارکڑد نا ستاءِ کرینے۔ سے شنبے نادے آ تینا ٹویٹ اٹی وزیراعظم یو این ای پی نا ہندا رپورٹ نا حوالہ ءِ ترسا پارے کہ اودے تینا ٹیم آ گمر ءِ۔ رپورٹ اٹی پاننگانے کہ نن تاریخ نا ہمو موڑ آٹی اُن ہراڑے ننے کاریم کننگ نا گرج ءِ و پاکستان دا اہم کوشست نا کماشی ءِ کننگ ءِ۔ وزیراعظم اسٹا ک ہوم 50+نا ویب سائٹ آ شینک مروک آ اسہ سرحال اس ہم شیئر کرے ہراٹی چاگڑد نا گچینی کن پاکستان نا کمکاری نا ذکر ءِ کننگا۔ یو این ای پی نا ایشیا و پیسیفک نا علاقائی ڈائریکٹر Dechen Tsering پارے کہ قدرتی چاگڑد نا بھلو کچ اسے آ بحالی نا گام گیج بشمول دہ بلین ٹری سونامی پروجیکٹ اقوام متحدہ نا دہائی ءِ سپورٹ کننگ و چاگڑدی نظام نا بحالی ءِ مون آ دننگ کن پاکستان نا کوشست آتیٹی مرکزی حیثیت تخک۔ پاکستان کن یو این ای پی نا جامع رپورٹ ’’ ملک انا قدرتی، انسانی و ودی کروک سرمایہ نا بابت تینا وڑنا اولیکو جاچ‘‘ اٹی پاننگانے کہ پاکستان نا حکومت نا قدرتی چاگڑد نا بحالی کون آ گام گیج آتے نمان ءُ۔ سرحال اٹی داہیت ءِ مون آ تخنگا ک اقوام متحدہ نا دہائی چاگڑدی نظام نا بحالی 2021-2030اٹی کم و ود اسہ سال اس گدرینگ انگ آن پد پاکستان تینا دہ بلین ٹری سونامی پروجیکٹ ءِ مون آ درسا دا نشان تننگ ءِ کہ دا رداٹ انت اس ممکن ءِ۔ داپروجیکٹ نا رداٹ 2019 آن دسمبر 2021 نا نیام اٹ کم و ود 10،000 ہند آتیا 1.36 ملین ایکڑ رقبہ غا 1.42 بلین درخت خلنگانے۔ پاکستان، ہرا 2021 اٹی جہانی یوم چاگڑد نا مہمانداری نا خاص وڑاٹ موسمیاتی بدلی نا منفی اثرآتا گواچی ءِ۔ داپروجیکٹ بناکننگ آن مست ادارہ خور و کشت وکشار (FAO) نا پٹ وپول آن معلوم مس کہ ملک انا بیرہ پنچ درسد بشخ جنگل آتیا تالان ءِ۔ پاکستان نا حکومت 2023 اسکان تینا رکھ علاقہ غاتے 15 درسد اسکان ودفنگ نا عزم کرینے ہرا 2018 ٹی 12 درسد ئسر۔ 2021 نا نیم اسکان دا 13.9 درسد مس۔ دہ بلین ٹری سونامی نئے بیرہ انحطاط پذیر چاگڑدی نظام نا بحالی و قدرتی سرمایہ ءِ گچین کننگ اٹ کمک فراوان کننگ ءِ بلکن دا ہندی آبادی تا کمک اٹ ذریعہ معاش ءِ ہم سیبو تننگ ءِ۔
