اسلام آباد۔ 28 مارچ (اے پی پی) وزیرخارجہ شاہ محمود قریشی پارے کہ اوغانستان اٹی سوگوی سویلی ایشیا تون اوار مچ آ دنیا نا شونہالی کن المی ءِ۔ داہیت ءِ او دوشنبے نادے آ داڑے سیمینار آن تران کرسا پارے۔ وزیرخارجہ پارے کہ اوغانستان ءِ علاقائی رداٹ آخا بلکن اسیجائی و اجتماعی زمواری نا وڑاٹ بایدے ہُننگے۔ اوپارے کہ اوغانستان اٹی نزوری نا مچ آ دنیا غا منفی اثرتمک۔ اوپارے کہ بے سہبی ہچ ءُ آپشن اس اف، اگہ جہانی برادری اوغانستان اٹ بے سہب مس تو اونا نتیجہ ٹی مہاجر آتا کچ ، دہشت گردی و منشیات نا اسمگلنگ اٹی ودکی مریک۔ وزیرخارجہ پارے کہ اگہ اوغانستان اٹی اقتصادی تنکی برجاسلیس تو بھرمک پدی مننگ کیرہ، ننے دادے توروئی مریک۔ وزیرخارجہ پارے کہ پاکستان مدام اوغانستان تون آخبتی رابطہ نا وکالت کرینے، دانازرک ریسہ غا انسانی امداد ءِ سیاست تون گنڈنگ سہی اف۔ شاہ محمود قریشی پارے کہ پاکستان داہیت آ یخین تخک کہ عبوری اوغان حکومت و جہانی برادری نا نیام اٹ پدریسہ رابطہ غاتیان اوغانستان نا پائیدار و شونہال آخبت ءِ پک کننگ اٹ کمک رسینگک۔ وزیرخارجہ پارے کہ داوخت آ اوغان عبوری نا اسہ مثبت پلو دادے کہ تہہ نا نزوری و خانہ جنگی اس اف، مسن تا اسکول آتے ملنگا، و دہشت گردی تون مون تننگ کن سنبرینگوک ءِ، اوغانستان دا وخت آ نازرک ءُ کسر اسے آ سلوک ءِ، 40 سال آن زیات وخت اٹی اولیکو وار دااونا مچ آ علاقہ ٹی اسہ یکتا متحد نظام ساڑی ءِ ، جنگ و خونریزی نا چاردہائی چٹا، کرپشن اٹ پیدوار کمتی بسنے ہراڑآن ریونیو ٹی ودکی مسنے۔ اوپارے کہ اوغانستان اسہ قابل عمل و پائیدار آخبت اسے نا کنڈآ ہِننگ نا لائخی تخک۔ ہنداخاطرآن جہانی برادری ءِ بالعموم و علاقائی ملک آتے خاص وڑاٹ دمدستی وڑاٹ اوغانستان اٹی سوگوی آ چکار کننگ نا گرج ءِ۔ وزیرخارجہ خبڑدار کرے کہ اگہ جہانی برادری تینا مستین نا ردینک آتے اِلیتو تو اونا اثر نئے بیرہ ننا ڈیہہ آ تمک بلکن جہانی کہول آ محسوس کننگک، اوغانستان اٹی انسانی تنکی آن بچنگ نا دمدستی گرج آن بیدس ننے اوغانستان اٹی مریس مدتی انفراسٹرکچر و کنیکٹیوٹی نا ڈٹ آتیا ہم چکار کروئی مریک۔ اوپارے کہ نن اوغانستان تون اہم بنداوی پنجر و رابطہ غاتا ڈٹ آتیا عمل کننگ اُن، پاکستان اسہ ہمسایہ ملک اسے نا ناطہ، اوغانستان نا امن و سوگوی ٹی اہم کڑد ادا کننگ ءِ۔
