اسلام آباد۔ 28 مارچ (اے پی پی) بنجائی وزیر خزانہ و محصولات شوکت ترین سیکرٹری وزارت صنعت و پیدوار ءِ ای سی سی نا فیصلہ نا رداٹ ہندی خریداری نا کمک اٹ چینی نا اسٹریٹجک کوڑی تا تفنگ نا عمل ءِ ترند کننگ و صارف آتے کوکنگ آئل آ درآمدی ڈیوٹی آ 10 درسد ریلیف تننگ ءِ پک کننگ کن دمدستی گام گیج آتا پارت کرینے۔ اوداپارت آتے دوشنبے نادے آ داڑے نیشنل پرائس مانیٹرنگ کمیٹی نا دیوان نا کماشی ءِ کرسا پارے، بنجائی وزیر قومی غذائی رکھ و پٹ وپول سید فخر امام، وزیراعظم نا سلاہکار واپار و زرکاری عبدالرزاق داؤد، سیکرٹری صنعت و پیدوار، صوبائی چیف سیکرٹری، اقتصادی سلاہکار خزانہ ڈویژن، ممبر نیشنل اکاؤنٹس پی بی ایس، ایم ڈی یوٹیلیٹی اسٹورز کارپوریشن ، چیئرمین اوگرا، ممبر کسٹمز ایف بی آر و ایلو سینئر آفیسر آک دیوان اٹی بشخ ہلکر۔ وزارت خزانہ نا اقتصادی سلاہکار فنانس ڈویژن دیوان نا بشخ ہلوک آتے نہاد آتا ہفتہ وار حساس اشاریہ ایس پی آئی نا بارواٹ حوال تس و پارے کہ تدوک آ ہفتہ ٹی نہاد آتا حساس اشاریہ ٹی پیوستہ ہفتہ نا 1.37 درسد کمتی نا مقابلہ ٹی 1.10 درسد ودکی مس۔ ہفتہ ٹی ہڑدے ئی کاریم اٹ اتنگ نا 8 گڑاتا نہاد آتیٹی کمتی، 18نا نہاد سوگو و 25 گڑاتا نہاد آتیٹی ودکی مس۔ دیوان ءِ پاننگاکہ توم، ٹماٹر، خواہے، ایل پی جی سلنڈر، گڑ، بورہ، دال چنا و خیسن آ دال انا نہاد آتیٹی تدوک آ ہفتہ ٹی کمتی مسنے۔ بشخ ہلوک آتے ملک اٹی خولم و نت انا نہاد آتا بارواٹ ہم حوال تننگا و پاننگاکہ کراچی ٹی نت انا نہاد آتیٹی ودکی مسنے ہراڑآن قومی اوسط نہاد زہمی مسنے۔ وزیرخزانہ ءِ ملک اٹی خولم نا کوڑی تا حالیت آتیان ہم معلومدار کننگا و پاننگاکہ ملک اٹی خولم بھلو کچ اسے ٹی دوئی۔ پوسکن آ فصل انا آمد و آخبت اٹ کھپت اٹی مون آ تخسا وزیرخزانہ وزارت قومی غذائی رکھ و پٹ وپول ءِ خولم نا پیدوار نا بارواٹی صوبائی حکومت آتا سلابت اٹ حقیقت آ مبنی حساب وکتاب تیار کننگ نا پارت کرے تانکہ آخبت اٹ خولم نا درآمد نا گچین وڑاٹ اندازہ مرے۔ بلوچستان حکومت نا نمائندہ پارے کہ صوبہ ٹی خولم نا بھلو کوڑی اس ساڑی ءِ۔ دیوان اٹی بشخ ہلوک آتے بورہ نا نہاد آتیان ہم معلومدار کننگا۔ وزیر خزانہ سیکرٹری وزارت صنعت و پیدوار ءِ ای سی سی نا فیصلہ نا رداٹ ہندی خرایداری نا کمک اٹ بورہ نا اسٹریٹجک کوڑی تا تفنگ نا عمل ءِ ترند کننگ نا پارت کرے۔
