اسلام آباد۔ 28 مارچ (اے پی پی) بنجائی وزیرداخلہ شیخ رشید احمد پارینے کہ سیاسی حالیت 72 گھنٹہ ٹی پیدوار مریک، مخلوق ضمیر فروش السی نمائندہ غاتیان بائیکاٹ کے، اپوزیشن نا جلسہ ٹی مخلوق جے یو آئی آ مریرہ و اداکار ن لیگ نا بریک، ہندا تُو اٹی بے پتی نا فیصلہ مریک و 72 گھنٹہ ٹی غٹ پیدوار مریک، وزیراعظم عمران خان اسہ آجو خارجہ پالیسی نا بنداو ءِ تخنگ ءِ ، نن وزیراعظم عمران خان تون سلوک اُن، تدوک آ دے وزیراعظم اسہ بھلو جلسہ سے نا کمک اٹ الس اٹ تینا مقبولیت نا شاہدی ءِ تس۔ دوشنبےنادے آ پریس کانفرنس آن تران کرسا وزیرداخلہ پارے کہ جمعیت علماء اسلام (ف) تون اینو نا جلسہ و دھرنا نا موکل اف، اونا این او سی چٹانے، مسلم لیگ ءِ اینو جلسہ نا موکل ءِ، وزیرداخلہ نا پاننگ ئس کہ خبر اف(ن ) لیگ ہراکان بریک ، اوفک داسکان ننے ہچ پاتنو، ن لیگ نا جلسہ کنا گمان آن زیات نزور ءِ ، اوفتے تون تینا بندغ اف ، دافک مولوی تیان تران کننگ کن بننگ ءُ، مولانا فضل الرحمان نا مدرسہ غاتیٹی چٹھیک ءُ، اینو ن لیگ ءِ جلسہ کننگ ناموکل ءِ دھرنا نا آخا، ای جھیڑہ خواپرہ جے یوآئی نا جلسہ چٹانے، او اینو بیدس موکل آن تولوک ءِ۔ وزیرداخلہ شیخ رشید احمد نا پاننگ ئس کہ داسکان حوال اف کہ تحریک بے پتی اینو پیش مننگ ءِ، 30 آن 31 مارچ اسکان آر یا پار مریک و بے پتی نا فیصلہ بریک، 72 گھنٹہ نا ٹائم ایتیوہ کہ اہم ءُ، وزیراعظم عمران خان آخیریکوگیند اسکان گوازی کیک۔ اوپارے کہ کنا سیاسی وجدان پاہک کہ اسہ گھنٹہ مست اسکان حالیت آک بدل مننگ کیرہ انتئے کہ 172بندغ اپوزیشن ءِ اتوئی ءِ۔ داٹی ہراڑے فیصلہ ءِ مروئی ءِ مریک، داسکان جلسہ جلسہ اسے، گوازی پگہ غان بناکیک۔ ای عمران خان تون سلوک اُٹ ۔ وزیرداخلہ شیخ رشید احمد پارے کہ دارالحکومت اٹی مروک آ مسلم لیگ (ن) نا السی مچی ءِ سیکورٹی فراوان کننگک۔ اوپارے کہ مسلم لیگ (ن) چندی شارتیان گدرینگوک آ تینا ریلی ٹی مچی ءِ متوجہ کننگ اٹ بے سہب مسنے۔ ہارس ٹریڈنگ آ است ہسونی نا درشانی ءِ کرسا اوپارے کہ الس داگچین مروک آ نمائندہ غاتے بائیکاٹ کے ہرا تینا ضمیر ءِ سودا کننگ ءُ۔ اوپارے کہ اوفتا دا عمل ملک انا سیاست و جمہوریت ءِ نسخان تننگ ءِ۔ شیخ رشید پارے کہ وزیراعظم عمران خان تدوک آ دے اسہ بھلو جلسہ سے نا کمک اٹ الس اٹ تینا مقبولیت نا شاہدی ءِ تسنے۔ اوراولپنڈی شار اکن نالہ لئی ڈٹ انا پڑو آ وزیراعظم نا ستاءِ کرے۔ شیخ رشید پارے کہ تدوک آ دے تحریک انصاف نا گچین ءُ جلسہ اس مس ، بلاول نا ریلی آن زیات ننا سیکورٹی ئسک، تدوک آ دے انا جلسہ غان پد مخلوق نا خنک بایدے ملنگر، 1977 آن پد اولیکو وار ای جلوس اتون ئسٹ، تدوک آ دے انتظامیہ جوان کاریم کرے۔ بنجائی وزیر پارے کہ پاکستان اٹی بھٹو خاہوت نا سیاست اف، داسہ زرداری نا سیاست چلینگ انگ ءِ، آصف زرداری شاطر و پلانر سیاست دان اسے، ہلنگ وبہاکننگ اٹ لگوک ءِ، سیاست اٹ ہارس ٹریڈنگ نا چرجوئی برجاءِ، دا گینگ آف تھری ءِ ہرا اسہ ایلو تون اوار اَلورہ، آصف زرداری نواب شاہ ٹی کونسلر مننگ کتو، ہلوک و بہاکروک السی نمائندہ غاتیان علاقہ نا مخلوق بائیکاٹ کے۔ اوپارے کہ گورنر راج انا سلاہ تسٹ اینو ہم پاننگ اٹی اُٹ گورنر راج ءِ خلبو انتئے کہ جمہوریت اٹی مخلوق سودا مننگ ءِ، نزور جمہوریت ہم ملک انا فائدہ ٹی مریک۔ او پارے کہ اسٹیبلشمنٹ بیرہ پاکستان تون ءِ، اومیت ءِ 30 آن 31 اسکان فیصلہ مریک۔ اسہ سوج اسے نا ورندی ٹی وزیرداخلہ پارے کہ ای بروک آ گچین کاری تیٹی بشخ ہلیو و یا ہلپر داسکان فیصلہ کتنوٹ۔ کنا مسخت نالہ لئی ایکسپریس وے ءِ، نیزگار آک ہزگار مریر۔ اوپارے کہ ای و کنا مخ تف آک وزیراعظم تون سلوک ءُ و اومیت ءِ کہ وزیراعظم مریک۔ اوپارے کہ پاک فوج ملکی سالمیت نا امین ءِ۔ اوپارے کہ وزیراعظم عمران خان اسہ آجو خارجہ پالیسی سے نا بنداو ءِ تخنگ ءِ، نن وزیراعظم عمران تون سلوک اُن، عمران خان اقتدار اٹی مرے یا مف نن اوڑتون سلوک اُن۔
