کوئٹہ۔ 25 مارچ (اے پی پی) صوبائی وزیر مواصلات و تعمیرات سردار عبدالرحمان کھیتران ریکوڈک معاہدہ ءِ تاریخی گوندسا پارینے کہ وزیراعلیٰ میر عبدالقدوس بزنجو معاہدہ غا دستخط کرسا بروک آ 50 سال اکن بلوچستان آ خزانہ نا درگہ غاتے ملانے، معاہدہ نا مخالفت کروک آک صوبہ نا الس نا خیر خواہ مننگ کپسہ۔ داہیت ءِ او جمعہ نادے آ داڑے صحافی تتون گپ وتران کرسا پارے۔ سردار عبدالرحمان کھیتران پارے کہ بلوچستان عوامی پارٹی صوبہ نا الس نا شونداری و شونہالی کن ہرممکن گام گیج کننگ ءِ، وزیراعلیٰ بلوچستان میر عبدالقدوس بزنجو ریکوڈک معاہدہ کرسا صوبہ نا شونداری نا درگہ غاتے ملانے۔ اوپارے کہ ریکوڈک معاہدہ غان بلوچستان ءِ بروک آ 50 سال اسکان فائدہ سرمریک ہموڑے صوبہ ٹی روزگار نا پوسکن ءُ وارخواہی ودی مریک و ایلو کنڈا صوبہ ٹی زرکاری ٹی ودکی مریک۔ اوریکوڈک معاہدہ غا وزیراعظم عمران خان، آرمی چیف جنرل قمر جاوید باجوہ ، وزیراعلیٰ بلوچستان میر عبدالقدوس بزنجو ءِ مبارکبادی تس۔ اوپارے کہ گڑاس مخلوق ریکوڈک معاہدہ نا مخالفت کننگ ءُ او بلوچستان نا الس و صوبہ نا شونداری نا خیر خواہ مننگ کپسہ۔ اوپارے کہ صوبائی حکومت نا سروک میر عبدالقدوس بزنجو ریکوڈک معاہدہ کرسا بلوچستان نا الس آ اسہ بھاز بھلو احسان اس کرینے معاہدہ غان پد بلوچستان اٹی شونداری نا پوسکن ءُ کسر ملنگک۔
