اسلام آباد۔ 25 مارچ (اے پی پی) صدر پاکستان ڈاکٹر عارف علوی پاکستان اٹی زرکاری نا وارخواہی تے تالان کرسا پارینے کہ درملکی زرکارآک ملک انا کاروبار دوست چاگڑد آن فائدہ ہرفر آجو زرکاری نظام آن درملکی کاروباری بندغ آتے ملک اٹی زرکاری نا ترغیب ملک۔ او جمعہ نادے آ داڑے برطانیہ نا کاروباری ڈل اتون اوڑدہی ٹی گپ وتران کریکہ۔ صدر مملکت پارے کہ پاکستان زرکاری کن اسہ پرکشش ءُ ہند اسے و داڑے زرکاری نا بے پناہ وارخواہی ساڑی ءِ، درملکی زرکارآک ملک انا کاروبار دوست چاگڑد آن فائدہ ہرفر۔ اوپارے کہ ملک انا آجو زرکاری نظام آن درملکی کاروباری بندغ آتے پاکستان اٹی زرکاری نا ترغیب ملک۔ صدر مملکت پارے کہ پاکستان و برطانیہ نا نیام اٹ گچین زرگزرانی و واپاری تعلقداری ءِ، برطانیہ نا کاروباری بندغ آک زرگزران نا چندی بشخ آتیٹی زرکاری نا وارخواہی تیان فائدہ ہرفر۔ اوپارے کہ حکومت خصوصی اقتصادی و ٹیکنالوجی زون اتھارٹی اس جوڑ کرینے وخت اس کہ درملکی زرکارآتا است بڈی کن آسودہی فراوان کننگ ءِ۔ صدر مملکت پارے کہ حکومت زرکارآتے پرکشش آسودہی تا فراوانی نا کمک اٹ خصوصی زون تیٹی زرکاری نا ترغیب تننگ ءِ۔
