اسلام آباد۔ 25 مارچ (اے پی پی) وزیرخارجہ مخدوم شاہ محمود قریشی سویلی پنجاب صوبہ نا جوڑ کننگ کن آئینی ترمیمی بل ءِ اسپیکر قومی اسمبلی اسد قیصر ءِ پیش کرے۔ ڈپٹی اسپیکر قومی اسمبلی قاسم سوری ہم داوخت آ ساڑی ئسک۔ وزیرخارجہ اسپیکر قومی اسمبلی ءِ درخواست کرے کہ دا بل ءِ دوشنبے آ اڈ ہلوک آ قومی اسمبلی نا دیوان نا ایجنڈا ٹی اوار کننگے۔ اسپیکر قومی اسمبلی اسد قیصر وزیرخارجہ نا درخواست آ دا سویلی پنجاب آئینی ترمیمی بل ءِ دوشنبے نادے آ اڈ ہلوک آ دیوان نا ایجنڈاٹی اوار کننگ نا پرمان کرے۔ وزیرخارجہ پارے کہ سویلی پنجاب صوبہ نا جوڑ کننگ پاکستان تحریک انصاف نا منشور نا بشخ ءِ۔ اوپارے کہ وزیراعظم عمران خان میلسی نا السی رابطہ جلسہ ٹی سویلی پنجاب آئینی ترمیمی بلءِ پارلیمنٹ اٹ اتنگ نا پڑو کرے، وزیراعظم عمران خان نا پارت آ ای آئینی ترمیمی بل ، وزارت کانود نا منظوری آن پد اسپیکر قومی اسمبلی نا خذمت اٹی پیش کرینٹ۔ اینو وزیراعظم عمران خان و پاکستان تحریک انصاف سویلی پنجاب نا الس تون کروک آ اسہ پین قول اسے پورو کرینے۔
