اسلام آباد۔ 25مارچ (اے پی پی) چیئرمین سینیٹ محمد صادق سنجرانی پارینے کہ پاکستان اٹی زرکاری کن سازگار چاگڑد ءِ و زرکارآتے آسودہی تننگ انگ ءِ، حکومت گچین پالیسی جوڑ کننگ ءِ ہراڑآن زرکارآتا پت بحال مس، ڈیہہ نا شونداری و شونہالی ٹی گوادر اہم ءُ کڑد اس ادا کیک۔سینیٹ سیکرٹریٹ آن جاری بیان نا رداٹ داخیال آتا درشانی ءِ او برطانوی زرکارکیری گوف نا ایم ڈی البرٹ بیرے لیسے، ٹرولیکس نا ایم ڈی تھامس البرٹ لیسے و اوفتا ڈل اتون گپ وتران کرسا کرے ہرافک جمعہ نادے آ داڑے اوڑتون اوڑدہی کریر۔ اوڑدہی ٹی سینیٹر شبلی فراز و سیف اللہ نیازی ئسک ہم ساڑی ئسر۔ اوڑدہی ٹی زرکاری نا بشخ اٹی ہڑتوم آ کنڈآتا کمکاری ءِ ودفنگ آ سجفنگا۔ اوڑدہی ٹی ڈل چیئرمین سینیٹ ءِ تینا دورہ نا مسخت آتا بارواٹ معلومدار کرے و پارے کہ پاکستان اٹ چاگڑد زرکاری کن سازگار، آسودہی تننگ انگ ءِ۔ کاروباری و زرگزرانی رابطہ الس ءِ پین خڑک اتنگ اٹ کمکار مریک۔ چیئرمین سینیٹ پارے کہ زرکارآتا پت زرگزران نا سوگوی ٹی کمکار جوڑ مریک۔ حکومت گچین پالیسی جوڑ کننگ ءِ ہراڑآن زرکارآتا پت بحال مس۔ گوادر اسہ پوسکن ءُ زرگزرانی مرکز نا حیثیت مون آ بننگ ءِ۔ اوپارے کہ برطانوی زرکارگوادر اٹی زرکاری نا وارخواہی تیان فائدہ ہرفنگ کیرہ ڈیہہ نا شونداری و شونہالی ٹی گوادر اہم ءُ کڑد اس ادا کیک۔ پاکستان نا برطانیہ تون تاریخی تعلقداری ءِ۔ واپاری ڈل آتا ہن وبر اٹ ترندی اتنگ آن زرگزرانی سرجزآتیٹی ترندی بریک۔ پاکستانی تا اسہ بھلو کچ اس برطانیہ ٹی آباد ءِ۔ برطانیہ ٹی رہینگوک آ پاکستانیک ہڑتوم آ ملک آتا نیام اٹ اسہ پول اسے نا کڑد ءِ ادا کننگ ءُ۔
