اسلام آباد۔ 25 مارچ (اے پی پی) ایوان صدر نا جامع مسیت آن ‘‘ علم انا اسلامی تصور و تسخیر کائنات’’ نا سرحال آ خطبہ جمعہ ءِ براہ راست نشر کننگا۔ ڈین علامہ اقبال اوپن یونیورسٹی ڈاکٹر محی الدین ہاشمی خطبہ تس۔ صدر مملکت ڈاکٹر عارف علوی و ایوان صدر نا کمامدار و عملہ نا باسک آک ہم داوخت آ ساڑی ئسر۔ ڈاکٹر محی الدین ہاشمی تینا خطبہ ٹی اسلامی رغاموک آتا رداٹ علم انا اہمیت ءِ تالان کرسا پارے کہ خواجہ صلی اللہ علیہ و آلہ وسلم آ نازل مروک آ اولیکو وحی ٹی علم انا ذکر بس، داڑآن علم انا اہمیت نا کساس ءِ خلنگ مریک۔ اوپارے کہ علم انا اسہ وڑ مشاہدہ و ایلو وڑ پٹ وپول و جستجو آن دوئی مریک۔ ساڑی ذخیرہ علم اٹی اضافہ پٹ وپول پاننگک و ہندا نا بنداو آ انسان شون ہلکونے۔ اوپارے کہ علم و پٹ وپول شون ہلک ملک آتا صفت ءِ و داڑآ او ملک آک بھاز چکار کرینو۔ اوپارے کہ مسلم امہ ٹی پٹ وپول و اجتہاد نا روشنا درور ساڑی ءِ۔ اسلام دنیا ءِ آخرت نا پالیز پارینے۔ دانا اہمیت ءِ پہہ مننگ نا گرج ءِ۔ علم اسہ قوم اسے نا جاگیر اف بلکن مچ آ انسانیت نا میرات ءِ۔ داوخت آ ملک و قوم انا سلامتی ، شونداری و شونہالی کن دعا کننگا۔ یات سلے کہ صدر مملکت ڈاکٹر عارف علوی نا پارت آ مخلوق نا راہشونی کن ایوان صدر نا جامع مسیت آن خطبہ جمعہ ءِ براہ راست نشر کننگ نا چرجوئی نا بناءِ کننگانے۔
