کوئٹہ۔ 24 مارچ (اے پی پی) وزیراعلیٰ بلوچستان میر عبدالقدوس بزنجو تون بلوچستان ورکرز اینڈ امپلائز گرینڈ الائنس (بیوگا) نا صدر و ایلو عہدیدار آتون داڑے مروک آ اوڑدہی ٹی گرینڈ الائنس نا خواست آتا ایسری کن جوڑ کمیٹی نا مرتب کروک سلاہ و سوج آتے زوت کابینہ ٹی پیش کننگ نا فیصلہ کننگا اوکان پد گریڈ الائنس برانز ءِ چٹفنگ نا پڑو کرے اوڑدہی ٹی صوبائی وزیر سردار عبدالرحمان کھیتران، میر نصیب اللہ مری ، پارلیمانی سیکرٹریز حاجی محمد خان طور اتمانخیل، مٹھا خان کاکڑ، چیف سیکرٹری بلوچستان مطہر نیاز رانا، سینئر ممبر بورڈ آف ریونیو ارشد مجید چیئرمین سی ایم آئی ٹی عبدالصبور کاکڑ سیکرٹری فنانس حافظ عبدالباسط ، بلوچستان گرینڈ الائنس نا صدر حبیب الرحمان مردان زئی، کمشنرکوئٹہ ڈویژن سہیل الرحمان بلوچ تون اوار گرینڈ الائنس نا ایلو عہدیدار آک بشخ ہلکر وزیراعلیٰ گرینڈ الائنس نا نمائندہ غاتون گپ وتران کرسا پارے کہ سڑک آتے بلاک کننگ آن ویل آک ایسر مفسہ بلکن غٹ ویل آتے تین پہ تینی افہام و تفہیم اٹ گپ وتران نا کمک اٹ ایسر کننگے، وزیراعلیٰ پارے کہ او داہیت انا جوانی درک تخک کہ گرینڈ الائنس نا خواست آک روا ءُ، ولے اوفتا خواست آتا ایسری کن ننے صوبہ نا مالی پوزیشن ءِ مون آ تخوئی ءِ و ننے غٹ اسٹیک ہولڈر آتے اوار ہلسا ویل آتے ایسر کرسا بلوچستان نا شونداری کاریم کننگ ءِ۔ اوپارے کہ خواست آتا ایسری کن کمیٹی اس جوڑ کننگانے و او کمیٹی نما روا حق و خواست و ملازم آتا فائدہ ٹی کاریم کیک، وزیراعلیٰ پارے کہ ہراتم نن حکومت ءِ بدل کرین تو برانز و دھرنہ ننے میرات اٹی ملا گلوبل ٹیچرز ،سی اینڈ ڈبلیو نا ملازم و بی ڈی اے نا ملازم آتا تنخواہ تا بناکون آ ویل آتے نن دمدستی وڑاٹ ایسر کرین۔ وزیراعلیٰ پارے کہ نم ننا خوانوک آ تپہ اورے و ننے نمے آ اومیت ءِ کہ نم تینا خواست آتا ایسری کن الس ءِ تکلیف تفیرے اوپارے کہ خوانخواستہ اگہ دا برانز و دھرنہ ٹی ناخوشگوار واقعہ اس پیش بریک تو اونا زمواری ہم ننے آ مریک اوپارے کہ الس نا تکلیف آتے مون آ تخسا اوتینا ہن و بر اٹی روٹ خلنگ و ٹریفک ءِ توننگ نا سختی اٹ منع کرینے وزیراعلیٰ پارے کہ ملازم آتے اوفتا غٹ روا حق تننگک وزیراعلیٰ داوخت آ چیف سیکرٹری ءِ پارت کرے کہ کمیٹی نا دیوان پدریسہ اتون اڈ ترسا ملازم آتا خواست آتے دمدستی وڑاٹ ایسر کننگے۔ داوخت آ گرینڈ الائنس نا صدر حبیب الرحمان مردان زئی وایلو سینئر عہدیدار آک وزیراعلیٰ نا منت واری ءِ ہرفسا پاریر کہ نی اسہ السی ءُ وزیراعلیٰ سے اُس و ننا خواست آتا بابت نا خصوصی است خواہی و چکار آ بھاز منت وار اُن۔
