اسلام آباد۔ 24 مارچ (اے پی پی) اسلامی کمکار تنظیم نا وزراء خارجہ کونسل نا چل ءُ ہشت می دیوان جموں و کشمیر نا بارواٹی اسہ لائحہ عمل اسے نا منظوری ءِ تسنے ہرانا مسخت دا دیرینہ جھیڑہ نا بارواٹی باسک ملک آتا نیام اٹ رابطہ غاتے مون آ دننگ ءِ۔ کشمیر میڈیا سروس نا رداٹ دا لائحہ عمل نا رداٹ باسک ملک آک بھارت تون تینا ہڑتوم آ کنڈآتا رابطہ غاتے ٹی جموں وکشمیر نا جھیڑہ ءِ ہرفرہ تانکہ اقوام متحدہ نا قرارداد آتا رداٹ دا متکن آ جھیڑہ نا پرامن ایسری کن پیش رفت کننگ مرے و کشمیری الس نا بنداوی انسانی حق انا شرف آ زور شاغنگ مرے۔ او آئی سی نا باسک ملک آک بھارت نا غیر کانودی کوزہ گیری ٹی جموں و کشمیر اٹی امن وسلامتی ، انسانی حق انا خلاف ورزی و بھلا انسانی حالیت آتا بارواٹ اقوام متحدہ و ایلو جہانی فورم تیا تینا موقف ءِ مربوط کیک۔ او مقبوضہ کشمیر اٹی انسانی حق انا حالیت آتیا پدریسہ نظر تخنگ کن کمک فراوان کیک۔ اسلامی کمکار تنظیم نا سیکرٹری جنرل علاقائی و انسانی حق انا تنظیم تتون اوار تینا چندی رابطہ غاتیٹی کشمیر نا ویل ءِ تالان کیک۔
