اسلام آباد۔ 24 مارچ (اے پی پی) پاکستان و ترکی واپار، دودوربیدگ و دفاع نا بشخ آتیٹی کمکاری ءِ ودفنگ نا گرج آ زور شاغانے ہڑتوم آ ملک آک ہڑتوم آ کنڈآتا تعلقداری تے پین گچین کننگ، چندی علاقائی و جہانی فورم تیا اسہ ایلو نا مخ تفی نا عزم انا درشانی ءِ کرینو۔ داامنائی سلاہ پنچ شنبے نادے آ صدر مملکت ڈاکٹر عارف علوی تون ترک چیف آف جنرل اسٹاف جنرل یاسر گلر نا اوڑدہی ٹی طے مس۔ اوڑدہی ٹی پاکستان اٹی ترکی نا سفیر احسان مصطفی ٰ یرداکل ہم ساڑی ئسک۔ صدر مملکت ڈاکٹر عارف علوی پارے کہ پاکستان و ترکی نا نیام اٹ سوگو تعلقداری ءِ، پاک ترک تعلقداری تے ہڑتوم آ ملک آتا تین پہ تینی فائدہ کن پین ودفنگ نا گرج ءِ ۔ اوپارے کہ واپار، آئی ٹی و دفاع نا بشخ آتیٹی ہڑتوم آ کنڈآتا کمکاری ءِ ودفوئی مریک۔ صدر عارف علوی پارے کہ پاکستان قبرص آ ترکی نا مخ تفی ءِ برجاتخک۔ صدر مملکت مقبوضہ جموں و کشمیر اٹی برجا انسانی حق انا خلاف ورزی، مسلمان تا نسل کشی ٹی بھارتی کڑد ءِ ہم مون آ تخا۔ صدر مملکت مدام پاکستان نا مخ تفی ءِ کننگ خاص وڑاٹ جھیڑہ جموں و کشمیر ، آ ترکی نا منت واری ءِ ہرفے۔ اوڑدہی ٹی فریق آک دا ہیت آ زور شاغا کہ اوغانستان اٹی امن آن الس نا شونہالی تون علاقائی واپار و رابطہ غاتے مون آ دننگک۔ ترک چیف آف جنرل اسٹاف جنرل یاسر گلر یوم پاکستان پریڈ نا سرسہب اڈتننگ آ صدر مملکت ءِ مبارکبادی تس۔ اوپارے کہ ترکی ہر پلیٹ فارم آ پاکستان نا مخ تفی ءِ برجاتخک ، ہڑتوم آ ملک آتا نیام اٹ دوستانہ تعلقداری پین سوگو کننگ نا گرج ءِ۔
