اسلام آباد۔ 24 مارچ (اے پی پی) بنجائی وزیر حوالکاری و شینکاری چوہدری فواد حسین پارینے کہ شطرنج نا ہرا گوازی نا اپوزیشن بناءِ کرینے اودے نن چٹفنہ، 27 مارچ آ تاریخی جلسہ اس مریک، سیوتی حکومت نا بشخ ءُ، و حکومت نا بشخ ہی مریرہ، سپریم کورٹ نا غٹ جج صاحب آک شرف نا قابل ءُ، ن لیگ نا بینچ انا برخلاف مہم نامذمت ءِ کینہ، بار ایسوسی ایشن اسہ سیاسی جماعت اسے نا سبسڈری بایدے جوڑ مف، پاکستان نا غٹ بار کونسل آک سپریم کورٹ بار نا داوڑنا مخلوق نا رویہ و کڑد انا نوٹس ءِ ہلسا اوفتا محاسبہ کن مون آ بریر۔پنچ شنبے نادے آداڑے سپریم کورٹ نا پیشن میڈیا تون گپ وتران کرسا بنجائی وزیر حوالکاری پارے کہ سپریم کورٹ نا غٹ جج صاحب آک شرف نا قابل ءُ، ن لیگ سوشل میڈیا غا دا بینچ انا برخلاف مہم نا بناءِ کرے ہرانا نن ترندی اٹ مذمت ءِ کینہ۔ اوپارے کہ ننے سپریم کورٹ بار آ پورو پت ءِ، اومیت ءِ کہ باندات آک آئین و کانود نا رداٹ مون آ کارہ۔ چوہدری فواد حسین پارے کہ سپریم کورٹ بار ایسوسی ایشن نا باسک انا حیثیت اٹ ذاتی وڑاٹ کنا سپریم کورٹ بار انا باڈی آ بھاز گڑتی ءِ۔ اوپارے کہ سپریم کورٹ بار غٹ مخلوق آن وونٹ ہلسا گچین مریک، بار ایسوسی ایشن اسہ سیاسی جماعت اسے نا سبسڈری بایدے جوڑ مف۔ بنجائی وزیر حوالکاری پارے کہ پاکستان نا غٹ بار کونسل آک سپریم کورٹ بار انا داوڑ نا مخلوق نا رویہ و کڑد انا نوٹس ءِ ہلسا اوفتا محاسبہ کن مون آ بریر۔ چوہدری فواد حسین پارے کہ مچ آ دنیا ٹی بار ایسوسی ایشنک سیاسی باندات آتیا تینے ایڑتر تخسا کڑد ادا کیرہ ولے داڑے بار ایسوسی ایشن تینے اسہ سیاسی جماعت اسے تون گنڈانے۔ اوپارے کہ سپریم کورٹ بار ایسوسی ایشن نا باڈی ٹی اسہ اِرا بندغ سپریم کورٹ بار ءِ یرغمال کرینو، ہندا رویہ نا سوب آن لاہور بار اٹی دا ٹولی ءِ شکست ہم مس۔ اوپارے کہ وکیل آک بار ایسوسی ایشن نا ساڑی آ سرکڑدہ غاتون خار انا درشانی ءِ کرینو، داڑآ پین توار بڑزمریک۔ بنجائی وزیر حوالکاری پارے کہ ننا غٹ تر چکار 27 مارچ نا جلسہ غاٹی ءِ، 27 مارچ آ پی ٹی آئی نا تاریخی جلسہ اس مریک۔ شطرنج نا ہرا گوازی نا اپوزیشن بناءِ کریسس ، اودے نن چٹفنہ۔ اسہ سوج اسے نا ورندی ٹی اوپارے کہ سپریم کورٹ جلسہ غاتا بابت فیصلہ ٹی پیدوار گائیڈ لائنز تسنے، اپوزیشن جلسہ نا داسکان درخواست تتنے، درو اپوزیشن تینا پروگرام ءِ ہم بدل کرینے ، لگک کہ اپوزیشن جلسہ کپک، 27 مارچ آ بیرہ پی ٹی آئی جلسہ مریک۔ اسہ پین سوج اسے آ بنجائی وزیر حوالکاری پارے کہ سیوتیک حکومت نا بشخ ءُ و حکومت نا بشخ ہی مریرہ، سیوتی تا سپورٹ ہم ہندا سرپرائز نا بشخ ءِ ہرانا ذکر ءِ وزیراعظم درو چارشنبے نادے آ کرینے۔
