اسلام آباد۔ 24 مارچ (اے پی پی) وزیراعظم عمران خان قوم ءِ پارینے کہ او 27 مارچ آ دا کلہو ءِ تننگ کن پیش تمر کہ او برائی تون تفوک افس، تانکہ آخبت اٹ کس اسے نا جرت مف کہ او ہارس ٹریڈنگ کرسا جمہوریت و قوم ءِ نسخان ایتے، ملک اٹی 30 سال آن لٹ وپل کروک آ داڑیل آتا ٹولی اسٹ مرسا پاش آن پاش پارلیمنٹرینز آتا ضمیر ءِ ہلنگ ءُ۔ پنچ شنبے نادے آ جاری کروک آ قوم انا پن تینا ویڈیو کلہو اٹی وزیراعظم عمران خان پارے کہ امر بالمعروف و نہی عن المنکر نا پرمان اللہ گوندانے، اللہ تعالیٰ مسلمان تے پرمان ایتک کہ نمے جوانی اتون و برائی و بدی نا برخلاف بش مروئی ءِ، داڑآن راج زندہ مریک۔ اوپارے کہ ملک اٹی داڑیل آتا ٹولہ ہرا 30 سال آن لٹ و پل کننگ ءِ، کرپشن کرسا پیسہ غاتے پیشن گدریفنگ ءِ داسہ اواسٹ مرسا پارلیمنٹرین آتا ضمیر نا نہاد ءِ خلکونو، اوفتے پاش آن پاش ہلنگ ءِ۔ وزیراعظم پارے کہ ای دا خواوہ کہ مچ آ قوم 27 مارچ آ کنتون بیرہ اسہ کلہو اس تننگ کن پیش تمر کہ نن بدی اتون آخا نن بدی نا برخلاف اُن، نن دا ملک انا جمہوریت و قوم انا برخلاف مروک آ دا ڈوہ انا برخلاف اُن۔ وزیراعظم پارے کہ دافک دُزی نا پیسہ غاتے ٹی السی نمائندہ غاتے ضمیر ءِ ہلنگ ءُ، قوم اوفتا برخلاف سلوک ءِ۔ وزیراعظم پارے کہ ای خواوہ کہ قوم 27 مارچ آ کنتون پیش تمے و مچ آ پاکستان ءِ سمامرے کہ مون آ کس اسے جرت مف کہ داوڑ ہارس ٹریڈنگ کرسا ملک انا جمہوریت و قوم ءِ نسخان ایتے۔
