لاہور۔ 24 مارچ (اے پی پی) بنجائی وزیر داخلہ شیخ رشید احمد پارینے کہ بیوقوف اپوزیشن وزیراعظم عمران خان ءِ سیاسی وڑاٹ دُوارہ زندہ کرینے، خودداری و آجو خارجہ پالیسی کن مچ آ قوم وزیراعظم عمران خان تون تفینے، داسہ گچین کاریک مریر تو اپوزیشن ءِ سمجھ بریک کہ وزیراعظم عمران خان اخس ءُ بھلو سیاسی واکداری اسے تون بریک، پاکستان اٹی گچین کاریک زوت ہم مننگ کیرہ، اگہ اپوزیشن تون حکومت نا گڑاس ناراض بندغ اریر تو نن تون ہم اوفتا بندغ ارے، کس اسے کشنگ انگ ءِ و نئے کس اس ہِننگ ءِ، کانود اٹی ایمرجنسی نا گنجائشت ساڑی ءِ۔ لاہور اٹی پریس کانفرنس کرسا وزیر داخلہ شیخ رشید احمد پارے کہ مسلم لیگ (ن) نا داتم اسکان ہچ ءُ درخواست اس بتنے ، اگہ شرارت یا ول اس مرے تو وزارت داکلہ زموار مفک، ننے داسکان پاننگتنے کہ دا ہراتم پیش تمرہ اوفتا روٹ انت مریک و دا انت اس خوارہ ، ننے درخواست تننگے و پاننگے تانکہ نن اونا رداٹ بست وبند کین، نن اوفتے سیکورٹی ایتنہ، انشاء اللہ حالیت آک پرامن مریرہ و دا دے خیریت اٹ گدرینگک۔ نن 2 ہزار رینجرز، 1 ہزار ایف سی و 9 ہزار پولیس تون اوار 12 ہزار سیکورٹی کارندہ مقرر کرینن، اگہ ضرورت پیش بس تو 1 ہزار ایف سی یا 1 ہزار رینجرپین بٹنگنہ۔ اوپارے کہ وزیراعظم عمران کان 27 مارچ آ پریڈ گراؤنڈ اٹی تاریخی و عظیم ءُ جلسہ اس کیک، ای قوم اٹ وخت اس کہ داخہ جوزہ خنتنوٹ اخس خودداری نا جنگ اکن ءِ ، دا ہموفتا جنگ اف ہرافک بینظیر بھٹو نا برخلاف تحریک بے پتی کن اسامہ بن لادن آن ہم ڈالر ہلکوسر۔ اوپارے کہ اینو ہموفتے فوج انا خیال بسنے ، بھاز جوان ءُ ہیت اسے ، پاکستان نا فوج عظیم ءُ فوج اسے و پاکستان نا عدلییہ مرہروک و صاحب علم عدلیہ سے ، ڈی جی ایف آئی اے ءِ پارینن کہ پاک فوج و عدلیہ نا برخلاف سوشل میڈیا غا کس اس برے تو اونا برخلاف دمدستی کانودی چارہ جوئی کننگے، ای تینٹ اودے ہُننگ اُٹ، دامننگ کپک کہ ملک دشمن، بھارتی ایجنٹ و درملکی ایجنڈاغا کاریم کروک آ دا ملک اٹی عظم فوج انا برخلاف سوشل میڈیا ءِ کاریم اٹ اتنگ کیر، داکنا دور اٹی مننگ کپک و اودے سختی اٹ لتاڑیوہ۔ شیخ رشید پارے کہ اگہ اپوزیشن تون حکومت نا گڑاس ناراض بندغ اریر ہرافتے راضی کننگ نا کوشست برجا ءِ تو ننتون ہم اوفتا بندغ ارے ہراوونٹ بٹنگ کن ہنپسہ ، بھاز دلچسپ و جوان ءُ مقابلہ اسے و قوم ءِ جوان ءُ خبر بِننگ کن ملک۔ اوپارے کہ ای بناءِ لاہور آن کریٹ ، مننگ کیک ای کراچی و ایلو شار تیا ہم کاو، ولے حالیت آک داسہ دے پہ دے گچینی نا کنڈآ کارہ ہراڑآن ملک و جمہوریت مون آ کاہک۔ نن اواری اٹ ویل آتے ایسر کینہ۔
