اسلام آباد۔ 24 مارچ (اے پی پی) وزارت خزانہ نا ترجمان پارینے کہ جہانی مالیاتی فنڈ انا توسیعی سہولت فنڈ انا رداٹ ہفت می جاچ اکن پاکستان و آئی ایم ایف نا نیام اٹ باقاعدہ بنداو و تکنیکی کہول آ گپ وتران نا چرجوئی برجاءِ، ستمبر اسکان آئی ایم ایف ناپروگرام ءِ پورو کننگ اٹ سنبرینگوک اُن۔ پنچ شنبے نادے آ داڑے جاری بیان اٹی وزارت خزانہ نا ترجمان آئی ایم ایف نا توسیعی فنڈ سہولت (ای ایف ایف) نا رداٹ ہفت می جاچ انا بابت میڈیا ٹی قیاس آرائی تیا تینا وضاحتی بیان اٹی پارینے کہ ہفت می جاچ انا رداٹ فریق آتا نیام اٹ باقاعدہ بنداو و تکنیکی کہول آ ورچوئل اوڑدہی تا چرجوئی برجاءِ ہراٹی معلومداری تا تبادلہ ہم مننگ ءِ۔ ہفت می جاچ انا رداٹ مذاکرات نا ہدف فریق آتا طے کروک ہدف آتا دوئی کننگ آٹے ہراٹی ساڑی آ کمکی و صنعتی شونداری کن پڑو کروک پیکج اوار ءِ۔ ترجمان پارے کہ داہیت آ امنائی سلاہ مسنے کہ دسمبر نا ایسر اسکان نا غٹ ہدف آتے دوئی کننگانے وخت اس کہ شش می جاچ انا رداٹ میمورنڈم آن اکنامک ان فنانشیل پالیسیز (ایم ای ایف پی) نا رداٹ ایکشن آ عملدرآمد ہم است جم ءِ۔ ترجمان پارے کہ ریلیف پیکج نا بابت غٹ سرجم بشمول مالیاتی آپشنز آئی ایم ایف تون شیئر کننگانے و دا بابت عمومی امنائی سلاہ ساڑی ءِ ولے جہانی مالیاتی فنڈ بروک آ منہ تُو اٹی انڈسٹریل پروموشن پیکج آ پین گپ وتران نا اشارہ تسنے۔ ترجمان پارے کہ دامذاکرات اٹی مفاہمت نا گمان ساڑی ءِ۔ وزارت خزانہ نا ترجمان پارے کہ تکنیکی وڑنا گپ وتران پورو مننگ آن پد ہفت می جاچ انا میمورنڈم آن اکنامک اینڈ فنانشل پالیسیز نا مسودہ آ گپ وتران بناکیک۔ حکومت پاکستان ءِ یخین ءِ کہ ایم ای ایف پی ءِ گڈیکو دروشم اس تننگ آن پد اپریل نا ایسر اسکان جہانی مالیاتی فنڈ انا بورڈ انا دیوان اڈ ہلیک۔ ترجمان پارے کہ پاکستان نا حکومت ستمبر اسکان آئی ایم ایف نا پروگرام ءِ پورو کننگ اٹ سنبرینگوک ءِ۔
