اسلام آباد۔ 19اپریل (اے پی پی) پاکستان مسلم لیگ (ن) ناحکومت گدرینگوک آ 4سال اٹی پبلک سیکٹر ڈویلپمنٹ پروگرام نا کمک اٹ ملک انا شونداری و معیشت نا سوگوی خاص کر توانائی نا کاختی نامون ئِ توننگ کن ویل ئِ تینا اولیت آتیٹی تخا۔ مئی 2017 ءآن مئی 2018 ءاسکان قومی گریڈ اٹی 10 ہزار میگاواٹ بجلی مرحلہ وار اوار کننگک۔ 2025 ءاسکان پاکستان نا شمار دنیا نا 25 بھلا معیشت آتیٹی مریک۔ وزیراعظم محمد نواز شریف نا سروکی ٹی حکومت جہانی مالیاتی ادارہ غاتا پت دوئی کننگ ئِ و جہانی بینک، اے ڈی بی پی و آئی ڈی بی پی کون آ ادارہ اقتصادی و راجی بشخ آتیٹی ساڑی حکومت تون کاریم کننگ کن تیارئِ۔ ساڑی حکومت نا 4سال اٹی سرکاری بشخ انا شونداری ڈٹ آتا حساب وکتاب نا رداٹ زرکار دوستانہ پالیسی تا کمک اٹ ملک اٹی توانائی تنکی نا چٹفنگ کن جنگی بنداو تیا کاریم نا بنائِ کرینے۔ ساڑی حکومت توانائی ناتنکی نا مون ئِ توننگ کن جامع حکمت عملی آ عمل کرسا چندی گونڈ و مریس وختی ڈٹ آتیا کاریم ئِ ترند کرینے، چین نا کمک اٹ بروک آ 8 آن 10 سال اٹی 21ہزارمیگاواٹ بجلی ودی کننگک ہراڑآن نئے بیرہ لوڈشیڈنگ چٹک بلکن کشت وکشار و صنعتی بشخ ئِ ہم شون ملک۔ داسوڈیم، دیامربھاشاڈیم ، نیلم جہلم ہائیڈر وپاور پروجیکٹ ، تر بیلا فور ودیکی ڈٹ، نندی پورو پاور پروجیکٹ، اوچ II پاور پروجیکٹ ، گڈوپاور اسٹیشن و گڈانی پاور پروجیکٹ کون آ ڈٹ آتا پوروی آن ملک توانائی نا تنکی ہمیشہ ہمیشہ کن چٹک۔ وزارت دیر و بجلی نا ذرائع نا رداٹ ساڑی حکومت برسراقتدار بننگ آن پد توانائی تنکی نا چٹنگ و معاشی بحالی ئِ تینا اولین ایجنڈا جوڑ کرینے و دامسخت کن چندی گام گیج آتا بنائِ کرینے۔ توانائی نا تنکی نا چٹفنگ کن بجلی دُزی نا توننگ و سلوک آ پیسہ غاتا وصولی کن اسہ پبی ئُ مہم اس چلیفنگ انگ ئِ۔
