اسلام آباد۔ 23 مارچ (اے پی پی) او آئی سی وزراء خارجہ کونسل نا 48 می دیوان نا وخت آ چارشنبے نادے آ داڑے وزیرخارجہ مخدوم شاہ محمود قریشی و اونا فلسطینی ہم منصب ریاض المالکی نا نیام اٹ اوڑدہی مس۔ ہڑتوم آ وزیر خارجہ غاک پاکستان و فلسطین نا نیام اٹ سیاسی، اقتصادی و پارلیمانی رابطہ غاتا مون آ دننگ کن اسیجائی کوشست آتے کاریم اٹ اتنگ آ امنا کریر۔ دفترخارجہ نا رداٹ اوڑدہی ٹی ہڑتوم آ کنڈآتا تعلقداری، فلسطین نا حالیت و تین پہ تینی است خواہی نا علاقائی و جہانی امور آ گپ وتران کننگا۔ وزیرخارجہ پارے کہ پاکستان ، فلسطین تون تینا تعلقداری تے خاص اہمیت ایتک۔ فلسطینی وزیر خارجہ فلسطین نا ساڑی حالیت آتیان وزیرخارجہ ءِ معلومدار کرے شاہ محمود قریشی پاکستان نا سرکڑدہ و الس نا کنڈآن فلسطین نا سرکڑدہ و الس کن یکجہتی نا درشانی ءِ کرے و وزیراعظم عمران خان او آئی سی وزراء خارجہ کونسل نا 48 می دیوان آن تران کرسا فلسطین نا ویل انا کنڈآ جہانی برادری نا چکار ءِ کرفے و دامتکن آ ویل انا زوت انصاف اٹ ایسر کننگ نا خواست آ زور شاغا۔ شاہ محمود قریشی پارے کہ پاکستان او آئی سی تون اوار غٹ جہانی فورم تیا فلسطین نا ویل اکن توار بڑز کرسا بسنے، پاکستان، فلسطین نا ببت تینا اصولی و پیدوار موقف آ سلوک ءِ۔ اوپارے کہ فلسطین نا بابت پاکستان نا پالیسی، پاکستانی الس نا جوزہ غاتا ترجمان ءِ۔ فلسطینی وزیرخارجہ فلسطین اٹی جنگ بندی کن پاکستان نا متحرک و فعال کڑد انا ستاءِ کرسا وزیرخارجہ مخدوم شاہ محمود قریشی و پاکستانی سرکڑدہ غاتا منت واری ءِ ہرفے۔
