اسلام آباد۔ 23 مارچ (اے پی پی) وزیرخارجہ مخدوم شاہ محمود قریشی پارینے کہ پاکستان ، ویژن نیامی ایشیا، نا پالیسی آ گامزن و کرغزستان تون اوار غٹ نیامی ایشیائی ریاست آتون واپاری و السی رابطہ غاتا مون آ دننگ نا خواہندار ءِ۔ داہیت ءِ اوچار شنبے نادے آ داڑے او آئی سی نا وزراء خارجہ کونسل نا 48 می دیوان نا وخت آ جمہوریہ کرغزستان نا تینا ہم منصب رسلان کازاک بائیف تون اوڑدہی ٹی پارے۔ اوڑدہی ٹی ہڑتوم آ کنڈآتا تعلقداری، چندی بشخ آتیٹی ہڑتوم آ کنڈآتا کمکاری نا مون آ دننگ تون اوار تین پہ تینی است خواہی نا اہم علاقائی و جہانی امور آ گپ وتران کننگا۔ وزیرخارجہ پارے کہ پاکستان کرغزستان تون ہڑتوم آ کنڈآتا تعلقداری تے خاص اہمیت ایتک، ہڑتوم آ ملک آتا تعلقداریک اسہ وڑ عقیدہ، تاریخ و دودوربیدگی قدر انا بنداو آ استوار ءُ۔ ہڑتوم آ وزیر خارجہ غاک اقوام متحدہ و او آئی سی تون اوار کثیر الجہتی فورم تیا ہڑتوم آ کنڈآتا تعلقداری و کمکاری نا جاچ ءِ ہلکر۔ وزیرخارجہ ساڑی آ تعلقداری تا وڑآ است جمی نا درشانی ءِ کرسا، ہڑتوم آ کنڈآتا ہن وبر، واپاری و اقتصادی تعلقداری تے ودفنگ و ادارہ جاتی میکانزم ءِ پین فعال کننگ کن باقاعدگی اٹ دیوان اڈ تننگ نا گرج آ زورشاغا۔ ہڑتوم آ وزیرخارجہ غاک پاکستان و کرغزستان نا نیام اٹ براہ راست فلائٹ آتا بنانا بابت ہم گپ وتران کریر۔ وزیرخارجہ پارے کہ پاکستان گوادر پورٹ نا کمک اٹ کرغزستان ءِ گونڈآ واپاری کسر نا فراوانی کن آمادہ ءِ۔ وزیرخارجہ توانائی ڈٹ کاسا 1000 ڈٹ انا زوت پوروی کن پاکستان نا مخ تفی نا درشانی و پاکستان۔چین۔کرغزستان۔اوغانستان، چار فریقی ٹرانزٹ ٹریڈ ایگریمنٹ نا نفاذ کن رابطہ غاتے ترند کننگ آ زورشاغا۔ ہڑتوم آ وزیر خارجہ غاک تعلیم نا بشخ اٹی کمکاری و الس نا کہول آ رابطہ غاتا مون آ دننگ کن پلو آتون اوار کرغستان اٹی زیر تعلیم پاکستانی طالب علم آتا راجی آسراتی نا بابت امور آ ہم گپ وتران کننگا۔ ہڑتوم آ وزیرخارجہ غاک تین پہ تینی است خواہی نا غٹ بشخ آتیٹی تین پہ تینی کمکاری ءِ برجاتخنگ و کثیر الجہتی فورم تیا تعلقداری تے پین سوگو کننگ کن رابطہ غاتا چرجوئی ءِ برجاتخنگ آ امنا کریر۔ کرغزستان نا وزیر خارجہ رسلان کازاک بائیف وزیرخارجہ ءِ 82 می یوم قرارداد پاکستان نا مبارکبادی ترسا 23 مارچ نا پریڈ اٹی پاکستان نا سلہہ بند فوج انا کسبی مہارت نا ستاءِ کرے۔
