اسلام آباد۔ 23 مارچ (اے پی پی) چیئرمین سینیٹ محمد صادق سنجرانی پارینے کہ پاکستان نا عرب دنیا نا اسلامی ملک آتون خڑکی تعلقداری ءِ، عراق و پاکستان نا نیام اٹ دیرینہ و دوستانہ تعلقداری ءِ ہرافتا ماسک اسیجائی عقیدہ، قدر و دودوربیدگ اٹ تفوک ءُ۔ اوداہیت ءِ چارشنبے نادے آ داڑے عراق نا وزیر خارجہ ڈاکٹر فواد محمد حسین تون پارلیمنٹ ہاؤس اٹی اوڑدہی ٹی پارے۔ اوڑدہی ٹی تین پہ تینی است خواہی نا امور و ہڑتوم آ کنڈآتا تعلقداری نا مون آ دننگ نا بابت گپ وتران کننگا۔ عراق نا وزیر خارجہ پاکستانی سرکڑدہ و قوم ءِ یوم پاکستان نا وخت آ مبارکبادی پیش کرے۔ چیئرمین سینیٹ پارے کہ پاکستان و عراق جہانی فورم تیا اسہ وڑ نقطہ نظر تخرہ و اسہ ایلو نا موقف نا مخ تف ءُ، ہڑتوم آ ملک آتا نیام اٹ السی رابطہ غاتے پین سوگو کننگ نا گرج ءِ۔ چیئرمین سینیٹ ہرسال عراق آ ہنوک آ ہزار آ پاکستانی زائر آتے آسراتی فراوان کننگ آ عراقی حکومت نا منت واری ءِ ہرفے۔ اوپارے کہ ہڑتوم آ ملک آتا نیام اٹ کثیر الجہتی کمکاری وخت انا اہم گرج ءِ۔ عراق نا حکومت و الس دہشت گردی نا ڈٹ کر مقابلہ ءِ کریر۔ پاکستان دہشت گردی نا برخلاف جنگ اٹ بھلو قربانی تسنے۔ چیئرمین سینیٹ پارے کہ اوغانستان نا امن نا اثر مچ آ ڈیہہ غا تمک۔ شونداری و شونہالی کن امن بھاز المی ءِ۔ پاکستان ڈیہہ ٹی اقتصادی و زرگزرانی شونہالی کن کوشست کننگ ءِ۔ چیئرمین سینیٹ پارے کہ او آئی سی نا باسک ملک آک کمکاری نا درشانی ءِ کریر، ہراڑآ نن اوفتا منت واراُن۔ عراق نا وزیر خارجہ پارے کہ ننے چندی بشخ آتیٹی پاکستانی تا گرج ءِ۔ عراق پاکستان تون تین پہ تینی کمکاری ءِ مون آ دننگ خواہک۔ چیئرمین سینیٹ کشمیر نا ویل آ عراق نا حکومت نا مخ تفی نا منت واری ءِ ہرفے۔ چیئرمین پارے کہ کشمیر نا ویل انسانیت نا ویل ءِ، جہانی برادری تینا کڑد ءِ ادا کے۔ چیئرمین سینیٹ واپاری و اقتصادی تعلقداری تے ودفنگ نا گرج آ زور شاغا وپارے کہ ادارہ جاتی کمکاری ءِ ودفنگ نا گرج ءِ۔ چیئرمین سینیٹ پارے کہ واپار، زرکاری، تعلیم، ٹیکنالوجی ، بنداوی پنجر نا شونداری و سلامتی نا بشخ آتیٹی ہڑتوم آ ملک آتا نیام اٹ کمکاری نا بھلو وارخواہی اس ساڑی ءِ۔ ڈپٹی چیئرمین سینیٹ مرزامحمد آفریدی، منظور احمد کاکڑ، سینیٹر حافظ عبدالکریم و سیکرٹری سینیٹ محمد قاسم صمد خان ئسک ہم اوڑدہی ٹی ساڑی ئسر۔
