اسلام آباد۔ 23 مارچ (اے پی پی) وزیراعظم عمران خان پارینے کہ پاکستان کورونا نا دین اتون مون تننگ کن سویلی ایشیا نا غٹ ملک آتیان جوان کاریم کرینے۔ چارشنبے نادے آ تینا اسہ ٹویٹ اسے ٹی وزیراعظم پارے کہ ہراوڑ نن کورونا نا دینی مرض اتون مون تسن اوڑکن ای تینا حکومت ءِ مبارکبادی تننگ خواوہ، اوپارے کہ پاکستان کورونا تنکی ٹی سویلی ایشیا نا غٹ ملک آتیان جوان کاریم کرے۔ داہیت ذکر انا قابل ءِ کہ جہانی بینک 2020/22نا ساؤتھ ایشیا انڈیکس اٹی دا ہیت ءِ امنا کرینے کہ پاکستان ڈیہہ ٹی غٹ آن کم بے روزگاری نا کچ اتون ایلو سویلی ایشیائی ملک آتے پدی ہلانے۔ جہانی بینک انا حساب وکتاب نا رداٹ 2020 آن 2022 اٹی سویلی ایشیا ٹی بے روزگار آبادی نا غٹ آن کم کچ پاکستان اٹی 4.3 درسد ئس وخت اس کہ اوڑآن چپ بھارت اٹی داوخت آ بے روزگاری نا کچ 8 درسد، مالدیپ اٹی 6.3 درسد، بنگلہ دیش اٹی 5.4 درسد، بھوٹان اٹی 5 درسد، سری لنکا ٹی 5.9 درسد و نیپال اٹی 4.7 درسد ئسک۔
