پاکستان تینا وتواجہی آ وخت اس کہ سمجھوتہ کپک، ہروڑنا پیشن نا جارحیت تون سختی اٹ مون تننگک، صدر مملکت ڈاکٹر عارف علوی

اسلام آباد۔ 23مارچ (اے پی پی) صدر مملکت ڈاکٹر عارف علوی پارینے کہ پاکستان تینا وتواجہی آ وخت اس کہ ہم سجھوتہ کپک وخت اس کہ ہروڑنا پیشن نا جارحیت تون سختی اٹ مون تننگک، پاکستانی قوم ملک ءِ سوگو و شونہال کننگ نا سفر اٹی یکجاسلک۔ چارشنبے نادے آ داڑے پریڈ ایونیو شکرپڑیاں ٹی یوم پاکستان نا پریڈ آن مہمان خاص انا حیثیت اٹ تران کرسا اوپارے کہ ای دشمن آ پیدوار کننگ خواوہ کہ پاکستان تینا وتواجہی آ وخت اس کہ سمجھوتہ کپک انتئے کہ قوم و اونا سلہہ بند فوج ہروڑنا جارحیت ءِ بے سہب کننگ کن تیار ءُ۔ داسال یوم پاکستان نا سالانہ دود ءِ بھاز اہمیت دوئی ءِ انتئے کہ 57 باسکی اسلامی کمکار تنظیم (او آئی سی ) نا وزراء خارجہ سلہہ بند فوج انا پریڈ نا درشانی ءِ ہرا۔ داوخت آ وزیراعظم عمران خان ، کابینہ نا باسک آک، درملکی سفارت کار ، بڑزکو سول و فوجی کمامدارآک و پاکستان کن خذمت آتیا سفتی سند دوئی کروک آ اہم شخصیت آتیان بیدس مخلوق نا بھلو کچ اس ساڑی ئسر۔ صدر مملکت یوم پاکستان نا وخت آ قوم ءِ مبارکبادی پیش کرے و پارے کہ دادے داوڑ خاص ءِ کہ دا ملک انا جوڑ مننگ نا 75 می سال دے انا وخت ءِ۔ پاکستان نا مہمانداری ٹی اوآئی سی نا 48 می وزراء خارجہ کونسل نا اِرادے ئی دیوان نا رداٹ اوپارے کہ بانی باسک انا حیثیت اٹ پاکستان اسلامی ملک آتا تنظیم نا سوگوی کن سنبرینگوک ءِ۔ اوداہیت ءِ مون آ تخا کہ دنیا ءِ فلسطین و کشمیر نا ویل آتون اوار چندی چیلنج مون تروک ءِ ہرافتا دمدستی ایسری نا گرج ءِ۔ اومچ آ دنیا ٹی اسلاموفوبیا نا ودوک آ کچ انا پیدواری ءِ کرسا پارے کہ اسلامی کمکار تنظیم (او آئی سی ) و پاکستان اونا برخلاف پبی کوشست کریر ہرانا نتیجہ ٹی اقوام متحدہ نا کنڈآن اسہ قرارداد اس منظور مس۔ اوداہیت آ است جمی نا درشانی ءِ کرے کہ ہر سال 15 مارچ آ اسلاموفوبیا نا انسداد نا دے انا وڑاٹ اڈتننگک و پارے کہ دا گام مچ آ دنیا ٹی مسلمان تا برخلاف خار ءِ توننگ اٹ کمک ایتک۔ اوغانستان  نا بارواٹی اوپارے کہ دنیا دا حالیت آتا نوٹس ہلے ہراڑے اوغان بین و نیزگاری نا دروشم اٹ انسانی تنکی نا گواچی ءُ۔ صدر پارے کہ پاکستان ءِ انتہاپسندی، بے سگی، جعلی خبر و زالبول آتا حق آن انکار نا چیلنج مون تروک ءِ۔ راج انا غٹ تپہ غاک خاص وڑاٹ عالم دین، لمہ و باوہ ، استاد و میڈیا غان خواست ءِ کہ او دا چرجوئی ٹی تینا زمواری نا احساس ءِ کیر۔ اوخاہوتی نظام ءِ قوم انا طاقت گوندا وپارے کہ داڑآن راجی پنجر ءِ برقرار تخنگ اٹ کمک رسینگک۔ اودایقین نا درشانی ءِ کرے کہ قوم ملک ءِ سوگو و شونہال کننگ نا سفر اٹی یکجا سلوک ءِ۔ اوپارے کہ دا دود ننا قوم انا سیوت، شونداری و ننا فوجی واکداری نا ڈیک ءِ۔ داکان مست صدر عارف علوی، وزیراعظم عمران خان ، وزیر دفاع پرویز خٹک ، چیئرمین جوائنٹ چیفس آف اسٹاف کمیٹی جنرل ندیم رضا، آرمی چیف جنرل قمر جاوید باجوہ، پاک فضائیہ نا سروک نیول چیف، چین انا سٹیٹ کونسلر و وزیر خارجہ وانگ یی، او آئی سی نا وزراء خارجہ و مہمانک سلہہ بند فوج انا دستہ غاتا مارچ پاسٹ ءِ ہرار۔ سعودی عرب، ترکی، ازبکستان، آذربائیجان و بحرین تون اوار سنگت ملک آتا دستہ غاک ہم پریڈ اٹی بشخ ہلکر۔ پاک فضائیہ نا سروک ایئر چیف مارشل ظہیر احمد بابر سدھو پوسکن آ J-10Cجیٹ جہاز آتون اوار پاک فضائیہ نا جنگی جہاز آتا چندی فارمیشن تا فلائی پاسٹ نا کماشی  ءِ کرے۔ پریڈ اٹی آرمرکور، آرٹلری، رینجرز، ایئر ڈیفنس، کوسٹ گارڈ ز و ارمڈ فورسز نرسنگ سروس نا زالبول آتا دستہ غاک ہم اوار ئسر۔ قراقرم نا ہفت جہاز آتا ‘‘شیردل ‘ ٹیم دلکش ایرو بیٹکس پیش کرے۔ ہر مسٹ آ سلہہ بند فوج آتا چھاتہ بردار آک 10،000 فٹ انا بڑزی آن فری فال نا درشانی ءِ کریر۔ صوبہ غاتا فلوٹس قومی ہم آہنگی آ مبنی لوک گیت و رقص آتا کمک اٹ تینا یکتا دودوربیدگ نا عکاسی ءِ کرے۔ داکان بیدس خصوصی وڑاٹ بٹنگوک آ ڈل آتا است خواہی کن او آئی سی ملک آتا خصوصی فلوٹ ہم پریڈ اٹی اوار کننگا۔