ریاض۔ 23 مارچ (اے پی پی) سعودی وزیر خارجہ شہزادہ فیصل بن فرحان تون ترکی، چین، تھائی لینڈ، تاجکستان و ترکمانستان نا وزیرخارجہ غاک اوڑدہی کرینو۔ سعودی خبررساں ادارہ نا رداٹ اسلام آباد اٹی شہزادہ فیصل بن فرحان و ترک وزیر خارجہ مولود اوغلونا اوڑدہی ٹی ترکی و سعودی عرب نا فائدہ غاتا دوئی کننگ کن ہڑتوم آ کنڈآتا تعلقداری، علاقائی و جہانی حالیت آتیا گپ وتران کننگا وخت ا س کہ مسلم وزراء خارجہ کانفرنس نا ایجنڈا غا ساڑی امورآ ہم شرہ مسنے۔ شہزادہ فیصل بن فرحان و ترکمانستان نا نائب وزیراعظم و وزیر خارجہ رشید میر ودوف ہڑتوم آ ایلم ملک آتا ہڑتوم آ کنڈآتا تعلقداری و کمکاری نا بشخ آتیٹی اوفتے پوسکن آ وڑتیا اتنگ نا وڑوڈول آتا جاچ ءِ ہلکونو۔ سعودی وزیر خارجہ و تھائی لینڈ نا ہم منصب نا اوڑدہی ٹی اسیجائی کمکاری نا غٹ بشخ آتیٹی سعودی عرب و تھائی لینڈ نا ہڑتوم آ کنڈآتا تعلقداری ءِ سوگو و پوسکن آ وڑتیا اتنگ نا وڑوڈول آتا جاچ ءِ ہلنگا و علاقائی و جہانی حالیت آتیا ہم گپ وتران کننگا۔ داوخت آ پاکستان اٹ متعین سعودی سفیر نواف المالکی و وزیر خارجہ نا دفتر نا ڈائریکٹر جنرل عبدالرحمان الداود ہم ساڑی ئسک۔
