اسلام آباد۔ 23 مارچ (اے پی پی) 82 می یوم پاکستان نا مرکزی دود بنجائی دارالحکومت نا شکرپڑیاں پریڈ گراؤنڈ اٹی اڈتننگا۔ دود اٹی سلہہ بند فوج انا اسیجائی پریڈ و مارچ پاسٹ انا شاندار درشانی ءِ کننگا۔ صدر مملکت ڈاکٹر عارف علوی دود انا مہمان خاص ئسک۔ وزیراعظم عمران خان ، وزیر دفاع پرویز خٹک ، چیئرمین جوائنٹ چیفس آف اسٹاف کمیٹی جنرل ندیم رضا، چیف آف آرمی اسٹاف جنرل قمر جاوید باجوہ ، چیف آف ایئر اسٹاف ایئر مارشل ظہیر الدین بابر سدھو و چیف آف نیول اسٹاف ایڈمرل محمد امجد خان نیازی ئسک ہم دود اٹی بشخ ہلکر۔ چین نا اسٹیٹ کونسلر و وزیر خارجہ وانگ یی، اسلامی کمکار تنظیم (اوآئی سی) نا وزراء خارجہ، کابینہ نا باسک، درملکی سفارت کار، بڑزکو سول و فوجی کمامدار و پاکستان کن نمان خذمت آتیا سفتی سند دوئی کروک آ اہم شخصیت آتیان بیدس و ایلو مہمانک سلہہ بند فوج انا اسیجائی پریڈ نا درشانی ءِ ہرار۔ سعودی عرب، ترکی، ازبکستان، آذربائیجان و بحرین تون اوار سنگت ملک آتا دستہ غاک ہم پریڈ اٹی بشخ ہلکر۔ سلہہ بند فوج انا چاک و چوبند دستہ غاک صدر مملکت، وزیراعظم، وزیر دفاع، چیئرمین جوائنٹ چیفس آف اسٹاف کمیٹی و سروسز چیفس ءِ سلامی تسر۔ داوخت آ صدر مملکت عارف علوی پریڈ اٹی اوار فوجی دستہ غاتا معائنہ ءِ ہم کرے۔ پاک فضائیہ نا سروک ایئر چیف مارشل ظہیر احمد بابر سدھو ساڑی ہی ٹی پاک فضائیہ نا فضائی بیڑہ ٹی اوار مروک آ پوسکن آ J-10Cجیٹ جہاز آتون اوار پاک فضائیہ نا جنگی جہاز آتا چندی فارمیشنز تا فلائی پاسٹ نا کماشی ءِ کرے۔ پریڈ اٹی آرمرڈ کور، آرٹلری ، رینجرز، ایئرڈیفنس، کوسٹ گارڈز، آرمڈ فورسز نرسنگ سروس نا خواتی دستہ، پاکستان بوائز اسکاؤٹس و گرلز گائیڈ آک ہم بشخ ہلکر۔ آرمر ڈکور، آرٹلری ، ایئر ڈیفنس انجینئر آتا دستہ دشمن آ ہیبت طاری کروک آ گڑاحرب اتون پریڈ اٹی اوار مسر۔ داکان بیدس میزائل و ایلو سلہہ پاکستان نا ناقابل تسخیر دفاع نا نشانی نا وڑاٹ پریڈ نا بشخ ئسر۔ داسال انا اسہ پین خاص ءُ ہیت اس پوسکن آ جے ٹین جنگی جہاز آتا فلائی پاسٹ ئسک ہراڑتون اوار اوار ایوی ایشن فلائی پاسٹ ہم مس۔ داوخت آ قراقرم نا ہفت جہاز آتا ‘‘شیردل، ٹیم دلکش ایروبیٹکس پیش کرے۔ ہرمسٹ آ سلہہ بند فوج آتا چھاتہ بردارآک 10،000 فٹ انا بڑزی آن فری فال نا شاندار درشانی ءِ کرے۔ دود اٹی بشخ ہلوک آک سلہہ بند فوج انا اسیجائی پریڈ، جنگی جہاز آتا فلائی پاسٹ و چھاتہ بردار آتا کنڈآن فری فال نا شاندار درشانی ءِ بھاز ستاءِ کریر و پبی داد تسر۔ داوخت آ صوبہ غاتا فلوٹس قومی ہم آہنگی آ مبنی لوک گیت و لوک ڈانس نا کمک اٹ تینا یکتا دودوربیدگ نا عکاسی ءِ کریر۔ داکان بیدس خصوصی وڑاٹ بٹنگوک آ ڈل آتا است خواہی کن او آئی سی ملک آتا خصوصی فلوٹ ہم پریڈ اٹی اوار کننگا۔ یات سلے کہ پاکستان نا آجوئی نا ڈائمنڈ جوبلی نا سال مننگ نا سوب آن 82 می یوم پاکستان و پریڈ ءِ یکتا و خاص اہمیت دوئی ءِ۔ داسال یوم پاکستان نا تھیم ‘‘ شاد رہے پاکستان’’ تخنگانے۔ دادعائیہ تھیم قومی ترانہ نا بشخ ‘‘مرکز یقین شادباد’’ آن ہلنگانے۔ پاک فوج انا شعبہ تعلقات عامہ آئی ایس پی آر دا بابت اسہ مسحور کن ملی نغمہ اس ہم جاری کرینے۔ داکان بیدس قوم و بابائے قوم ءِ خراج تحسین پیش کننگ کن آئی ایس پی آر گونڈ ءُ پی ایس ایمز اس ہم جاری کرینے۔
