اسلام آباد۔22مارچ (اے پی پی): مزن وزیر عمران خان ءَ سرجمیں دنیاءِ مسلمان آناں تکانسر کنوکیں اسلامو فوبیا ءِ جیڑہ ء ُ جنجال ءُ اے ھترناکی ءَ را گرء ُدار کنگءِ ھاترءَ اوآئی سی ءِ باسکیں ملک آنی یکجاہی گامگیج ءِ ارزشت ءِ سرءَ زور پِر داتگ، پاکستان ءُ سعودی عرب ءِ نیام ءَ نزیکیں ، براتیں سیادی ء ُ راج دپتری نزیکی اَست، دو ئیں ملک آنی نیام ءَ بازیں پڑآں دونیمگی کمک ءَ را گیش کنگءِ ھاترءَ نوکیں کشک درگیجگ ءِ ضلورت اِنت۔ اے ھیالانی درشانی آئی ءَ سئے شمبے ءِ روچءَ اسلامی تعاون تنظیم ءِ دری کارانی وزیر کونسل ءِ 48 می دیوان ءِ موہ ءَ سعودی عرب ءِ دری کارانی وزیر شہزادہ فیصل بن فرحان السعود ءَ گوں گندء ُنند کنان ءَ کتگ۔ مزن وزیر ءَ اسلامی تعاون کی تنظیم (او آئی سی) ءَ را اسلامی دنیاءِ مول ء ُ مراد ءِ ھاتر ءَ یک حاسیں پلیٹ فارم ءِ ردءَ دیما برگ ءِھاترءَ سعودی عرب ءِ رہشونی کردءَ را ساڑاتگ۔ گندء ُنندءِ تہا سرجمیں دنیا ءَ مسلمان آناں تکانسر کنوکیں اسلامو فوبیا ءِ جیڑہ ءُ جنجالانی سرءَ چمشانکک داتگ ء ُ مزن وزیر عمران خان ءَ اے ھترناکی ءَ را گرء ُ دار کنگ ءِ ھاترءَ ا وآئی سی ءِ باسکیں ملک آنی مُچی گامگیج ءِ ارزشت ءِ سرءَ زور پِر داتگ۔ گندء ُنندءَ بازیں دمگ ءُ میاں اوستمانی کار، اوگانستان ءِ جیڑہ ءُجنجال ء ُ بھارت ءِ غیر قانودیء ُمقبوضہ جموں و کشمیر ءِ جاورھال ءِ سرءَ ھیال ء ُ لیکہ ءِ درشانی کنگ بوتگ۔ سعودی عرب ءِ دری کارانی وزیر شہزادہ فیصل بن فرحان السعود ءَ او آئی سی دری کارانی وزیر کونسل ءِ 48 می دیوان ءِ سوبمند بوہگءَ مزن وزیر ءَ را مراد بات داتگ۔
