اسلام آباد۔ 22 مارچ (اے پی پی) وزیراعظم عمران خان پارینے کہ پاکستان و قازقستان نا نیام اٹ واپار و تین پہ تینی رابطہ غاتیٹی ودکی کن کمکاری ءِ ودفنگ نا گرج ءِ، پاکستان اقوام متحدہ، او آئی سی ، ایس سی او و ای سی او کون آ علاقائی و جہانی فورم آتون اوار تین پہ تینی است خواہی نا غٹ بشخ آتیٹی ہڑتوم آ ملک آتا نیام اٹ کمکاری ءِ ودفنگ کن سنبرینگوک ءِ۔ سے شنبے نادے آ اسلامی کمکار تنظیم نا وزراء خارجہ کونسل نا 48 می دیوان نا وخت آ قازقستان نا وزیر خارجہ مختار تلی بردری وزیراعظم عمران خان تون اوڑدہی کرے۔ داوخت آ قازقستان نا پاکستان تون ہڑتوم آ کنڈآتا تعلقداری تون اوار اوار علاقائی و جہانی امور آ گپ وتران کننگا۔ وزیراعظم ستمبر 2021 اٹی شنگھائی کمکار تنظیم (ایس سی او ) سروک دیوان نا وخت آ قازقستان نا صدر قاسم جومارٹ توکایوف تون اوڑدہی نا ذکر ءِ کرسا پاکستان نا وژن سینٹرل ایشیا پالیسی ءِ دُوارہ پارے۔ اوہڑتوم آ ملک آتا نیام اٹ واپار و رابطہ غاتیٹی ودکی کن کمکاری ءِ ترند کننگ نا گرج آ زور شاغا۔ اوڑدہی ٹی اوغانستان تون اوار چندی علاقائی و جہانی امور آ ہم گپ وتران کننگا۔ قازقستان نا وزیر خارجہ وزیراعظم عمران خان ءِ قازقستان اٹی مروک آ پیش رفت و ہڑتوم آ کنڈآتا کمکاری آن معلومدار کرے۔ وزیراعظم اقوام متحدہ، او آئی سی، ایس سی او و ای سی او کون آ علاقائی و جہانی فورم آتون اوار تین پہ تینی است خواہی نا غٹ بشخ آتیٹی ہڑتوم آ ملک آتا نیام اٹ کمکاری ءِ ودفنگ کن پاکستان نا عزم انا درشانی ءِ کرے۔ اوپارے کہ او داسال انا ایسر اٹ قازقستان نا صدر نا دورہ پاکستان نا خواہندار ءِ۔
