راولپنڈی۔ 22 مارچ (اے پی پی) آذربائیجان نا وزیر دفاع کرنل جنرل ذاکر حسنوف سے شنبے نادے آ داڑے جی ایچ کیو ٹی آرمی چیف جنرل قمر جاوید باجوہ تون اوڑدہی کرے۔ اوڑدہی ٹی تین پہ تینی است خواہی نا امور، علاقائی سلامتی نا حالیت و چندی بشخ آتیٹی ہڑتوم آ کنڈآتا کمکاری آ گپ وتران کننگا۔ پاک فوج انا شعبہ تعلقات عامہ (آئی ایس پی آر) نا رداٹ دا وخت آ آرمی چیف پارے کہ پاکستان آذربائیجان تون تینا تعلقداری تے قدر انا نظر اٹ ہرک ہرا مذہبی تعلقداری، اسیجائی قدر، جیو سٹریٹجک اہمیت، تین پہ تینی فائدہ مند و ودوک آ اقتصادی و دفاعی کمکاری نا گمان تیا مبنی ءُ۔ ہڑتوم آ ک ڈیہہ ٹی امن و سلامتی کن کوشست آتون اوار ہڑتوم آ کنڈآتا تعلقداری تے پین مون آ دننگ نا است خواہی نا درشانی ءِ کریر۔ او آئی سی نا وزراء خارجہ نا 48 می کونسل نا دیوان نا حوالہ ءِ ترسا آرمی چیف اودے اوغانستان نا سنگین انسانی حالیت آتون مون تننگ و ڈیہہ ٹی امن و سوگوی کن مون آ بروک چیلنج آتا ایسر اس پٹنگ نا چرجوئی ٹی جہانی برادری ءِ اسیجائی وژن و حکمت عملی آ اتنگ کن اسہ تاریخی پیش رفت اس گوندا۔ شرفمند آ مہمان علاقائی سوگوی ٹی پاکستان ناکڑد انا ستاءِ کرے و پاکستان تون ہر کہول آ سفارتی کمکاری ٹی پین گچینی کن تینا کڑد ءِ ادا کننگ نا عزم ظاہرکرے۔ او اوآئی سی نا 48 می وزراء خارجہ کونسل نا مہمانداری آ پاکستان نا کوشست آتا خصوصی وڑاٹ ستاءِ کرے۔
