راولپنڈی۔ 22 مارچ (اے پی پی) جمہوریہ کرغزستان نا وزیر خارجہ رسلان قازاکبایف سے شنبے نادے آ داڑے جی ایچ کیو ٹی آرمی چیف جنرل قمر جاوید باجوہ تون اوڑدہی کرے۔ اوڑدہی ٹی تین پہ تینی است خواہی نا امور بشمول فوج اتون فوج تعلقداری، علاقائی سلامتی نا حالیت و ہڑتوم آ کنڈآتا دفاعی کمکاری ءِ پین ودفنگ نا گام گیج آتیا گپ وتران کننگا۔ پاک فوج انا شعبہ تعلقات عامہ (آئی ایس پی آر ) نا رداٹ اوڑدہی ٹی ہڑتوم آ کنڈآتیان ڈیہہ ٹی امن و سلامتی کن کوشست آتون اوار ہڑتوم آ کنڈآتا تعلقداری تے پین مون آ دننگ نا است خواہی نا درشانی ءِ کننگا۔ آرمی چیف او آئی سی نا وزراء خارجہ نا 48 می کونسل نا دیوان نا حوالہ ءِ ترسا اودے اوغانستان نا سنگین انسانی حالیت آتون مون تننگ و ڈیہہ ٹی امن و سوگوی کن مون آ بروک آ چیلنج آتا ایسر اس پٹنگ نا چرجوئی ٹی جہانی برادری ءِ اسیجائی وژن و حکمت عملی آ اتنگ کن اسہ تاریخی پیش رفت اس گوندا۔ شرفمند آ مہمان علاقائی سوگوی ٹی پاکستان نا کڑد انا ستاءِ کرے و پاکستان تون ہر کہول آ سفارتی کمکاری ٹی پین گچینی کن تینا کڑد ءِ ادا کننگ نا عزم ظاہر کرے۔ او او آئی سی نا 48 می وزراء خارجہ کونسل نا مہمانداری آ پاکستان نا کوشست آتا خصوصی وڑاٹ ستاءِ کرے۔
