اسلام آباد۔ 22 مارچ (اے پی پی) وزیراعظم عمران خان پارینے کہ دنیا نا یک و نیم ارب مسلمان تے بلاک اسے ٹی بشخنگ و جھیڑہ غاتیٹی اختہ کننگ نا جاگہ غا امن کن تینا طاقت ءِ بایدے پاش کننگے، بنداوی ایشوز آ او آئی سی ءِ اسہ متحدہ فرنٹ اس جوڑ کروئی مریک، نن جھیڑہ نا آخا امن نا شریدار اُن، دنیا ٹی اسلام بیرہ اسٹ ءِ، اسلامی قدر ءِ اخہ در خطرہ داوخت آ ارے مستین اٹ الوکہ، اونا رکھ انا گام گیج کروئی ءِ، جہانی کانود اقوام متحدہ نا سلامتی کونسل نا قرارداد آتیان پد ہم فلسطین و کشمیر نا مسلمان تے اوفتا بنداوی حق آن محروم تخنگ انگ ءِ، اسلاموفوبیا نا توننگ کن 15 مارچ انا جہانی دے اڈتننگ نا تاریخی قرارداد نا منظوری مسلم امہ نا بھلو سرسہبی اسے، مسلم ملک آتے تینا خارجہ پالیسی ٹی کور ایشوز آ اسٹ مرسا مون آ ہِننگ نا گرج ءِ، روس یوکرین جنگ اٹ او آئی سی ثالث نا کڑد ءِ ادا کننگ کیک، دا جھیڑہ غان دنیا ٹی پیٹرول و خولم نا نہاد آک ودنگ ءُ، اسہ سوگو اوغانستان جہانی دہشت گردی ءِ توننگ نا اسٹ انگا کسر ءِ۔ او سے شنبے نادے آ اسلامی کمکار تنظیم (او آئی سی ) نا وزرائے خارجہ کونسل نا 48 می دیوان نا بنائی سیشن آن تران کریکہ۔ وزیراعظم پارے کہ 15 مارچ آ اسلاموفوبیا نا برخلاف جہانی دے ءِ اڈتننگ نا قرارداد نا اقوام متحدہ غان منظوری اسہ بھلو سرسہبی اسے، 15 مارچ آ نیوزی لینڈ اٹی اسہ سلہہ بند بندغ اس مسیت اٹی پترینگسا 50 مسلمان تے شہید کرے۔ نائن الیون آن پد اسلام ءِ دہشت گردی تون گنڈنگا، ہمووخت آ مسلم ملک آتا حکمرانک داڑآ پبی موقف اختیار کننگ ناجاگہ غا تینے روشن خیال و اعتدال پسند گوندار، اسلام آباد ءِ دہشت گردی تون گنڈنگ نا عمل آن غٹ آن زیات دیکی ٹی مسلمانک زہمی مسر، ہموڑے ہر دہشت گردی آن پد دمدستی دوبہ اسلام آ خلنگا۔ اوپارے کہ راج اس امر منہ جنونی تا حرکت نا زموار مننگ کیک۔ اولیکو وار داامنا کننگاکہ اسلاموفوبیا اسہ خارتس ءُ گڑاسے۔ وزیراعظم پارے کہ ہرا ملک آک ریاست مدینہ نا اصول آتے تینا کریر اوفک شونہال مسر، ریاست مدینہ نا جوڑ کننگ دنیا نا بھلا انقلاب ئسک۔ نبی پاک صلی اللہ علیہ و آلہ وسلم بیرہ مسلمان تیکن آخا بلکن مچ آ امت اکن رحمت اللعالمین ئس۔ وزیراعظم پارے کہ مسلم ملک آتا غٹ آن زیات وائٹ کالر ڈوہ تا مون ءِ توننگ ئس۔ داڑے نزور ءِ کانود اٹ سزا تننگک و واکدار ءِ اِلنگک ۔ اقوام متحدہ نا رپورٹ نا رداٹ سالانہ 1.6 ارب ڈالرز ہمو ملک آتیان کشنگک، پدتموک ملک آتیٹی نیزگاری وسیلہ غاتا کمتی آخا کرپشن نا سوب آن ءِ، قائد اعظم دا ملک ءِ اسل ریاست مدینیہ جوڑ کننگ خواہسکہ، او پارے کہ دیکی ٹی تینا ساہدار تا داخہ خیال ءِ تخنگک اخس نن تینا انسان تا ہم تخپنہ، سوئٹزرلینڈ تینا 99 درسد وسیلہ مفننگ آن پد ہم دنیا نا شونہال ملک ءِ۔ وزیراعظم پارے کہ زالبول آتے اوفتا حق ءِ تننگ نبی اکرم خاتم النبین صلی اللہ علیہ و آلہ وسلم نا کنڈآن اسہ انقلابی ءُ گام اس ئسک۔ بدبختی اٹ پاکستان اٹ 70درسد زالبول آتے میرات آتے ٹی حق تفننگک، نن دابابت کانود سازی کرینن۔
