اسلام آباد۔ 22 مارچ (اے پی پی) قازقستان نا نائب وزیراعظم مختار تلبردی پارینے کہ مسلم امہ نا نیام اٹ سیوت و سخا و چیلنج آتون مون تننگ کن اسیجائی حکمت عملی وخت انا گرج ءِ، سلامتی کونسل نا قرارداد آتا رداٹ کشمیر نا ویل و فلسطین نا ویل انا ایسر المی ءِ۔ سے شنبے نادے آ قازقستان و ایشیاٹولی نا نمائندہ نا وڑاٹ اسلامی کمکار تنظیم نا وزرائے خارجہ نا کونسل نا 48 می دیوان آن تران کرسا قازقستان نا نائب وزیراعظم پارے کہ او آئی سی وزرائے خارجہ کونسل نا دیوان نا پاکستان ءِ گچین مہمانداری آ مبارکبادی پیش کیوہ۔ داوخت آ دنیا ءِ جہانی کہول آ چندی جھیڑہ غاتا مون تروک ءِ۔ روس یوکرین جھیڑہ غان جہانی زرگزران زور انا گواچی ءِ۔ اوپارے کہ قازقستان کشمیر نا ویل انا سلامتی کونسل نا قرارداد آتا رداٹ انصاف اٹ ایسر ی ءِ خواہک ، داڑتون اوار اوار سلامتی کونسل نا قرارداد آتا رداٹ فلسطین نا ویل انا ہم انصاف اٹ ایسری ءِ خواہک۔ اوپارے کہ ڈیہہ نا ایلو ملک آتون دیرپا تعلقداری قازقستان نا اولیت ءِ۔ ملک آتا اسہ ایلو آ سیبو ودنگ ءِ۔ فیک نیوز مذہبی و نسلی خارانا سوب جوڑ مننگ ءِ۔ اوغانستان نا حالیت آتیا ننے گڑتی ءِ۔ اوغانستان ءِ انسانی بنداو تیا دمدستی امداد نا گرج ءِ۔
