اسلام آباد۔ 22 مارچ (اے پی پی) وزیرخارجہ مخدوم شاہ محمود قریشی پارینے کہ پاکستان اسلامی کمکار تنظیم نا کڑد ءِ پین سوگو کننگ نا خواہندار ءِ۔ کشمیر میڈیا سروس نا رداٹ شاہ محمود قریشی اینو اسلام آباد اٹی اسلامی کمکار تنطیم نا وزرائے خارجہ کونسل نا بنائی دیوان آن تران کرسا پارے کہ بطور باسک پاکستان اسلامی ملک آتا نیام اٹ رواداری ءِ مون آ دیک۔ وزیرخارجہ شاہ محمود قریشی او آئی سی آ زور شاغا کہ او امت مسلمہ ءِ مون تروک چیلنج آتون مون تننگ کن اجتماعی ردعمل نا درشانی ءِ کے۔ اوپارے کہ او آئی سی کم و ود اِرا ارب مسلمان تا اجتماعی توار ءِ۔ دا مسلم ملک و جہانی برادری نا نیام اٹ اسہ پول اسے۔ امت مسلمہ ٹی یکجہتی و کمکاری ءِ مون آ دننگ پاکستان نا خارجہ پالیسی نا مرکزی تمبہ غاتیان اسٹ ءِ۔ اوپارے کہ او آئی سی دیوان نا 48 می دیوان نا چیئرمین نا حیثیت اٹ پاکستان نا بنداوی ہدف مسلم ملک آتا نیام اٹ کمکاری ءِ پین سوگو کروئی مریک۔ فلسطین و بھارت نا غیر کانودی کوزہ گیری ٹی جموں و کشمیر اٹی حالیت آتا ذکر ءِ کرسا شاہ محمود قریشی پارے کہ فلسطین و بھارت نا غیر کانودی کوزہ گیری ٹی جموں وکشمیراٹی مسلمانک داسہ ہم محکومی نا گواچی ءُ۔ اوپارے کہ نن قرارداد آتے تینا کننگ آن مون آ ہنسا دا جھیڑہ غاتا آخبتی ایسری کن پبی گام گیج کین۔
