اسلام آباد۔ 22 مارچ (اے پی پی) اسلامی شونداری بینک (آئی ڈی بی ) ٹولی نا صدر ڈاکٹر محمد الجسیر پارینے کہ اوغانستان نا الس نا امداد کن اسلامی کمکار تنظیم و امداد تروک آ ملک و ادارہ غاتیان بیدس جہانی برادری ءِ سوگو کوشست آتا گرج ءِ یوم پاکستان نا وخت آ پاکستان نا الس و حکومت ءِ مبارکبادی ایتیوہ۔ اوداہیت ءِ سے شنبے نادے آ داڑے اسلامی کمکار تنظیم (او آئی سی) وزرائے خارجہ کونسل دیوان نا بنائی سیشن آن تران کرسا پارے۔ اواو آئی سی ملک آتا نیام اٹ واپار و واپاری راہداری تا مون آ دننگ نا گرج آ زور شاغا و پارے کہ اسلامی ملک آتا نیام اٹ واپار و اقتصادی بشخ آتیٹی کمکاری ءِ مون آ دننگ وخت انا گرج ءِ۔ اسلامی شونداری بینک انا صدر اوغانستان کن ہیومینٹرین ٹرسٹ فنڈ انا ٹہیفنگ نا ستاءِ کرے و پارے کہ دا اوغانستان نا الس تون او آئی سی نا کنڈآن یکجہتی نا درشانی ءِ، دا فنڈ انا آپریشنل مننگ آن اوغانستان اٹی انسانی ہمدردی نا بنداو آ امداد نا فراوانی ممکن مننگ کیک۔، ننا کوشست مریک کہ فنڈ انا کمک اٹ دوئی کروک عطیہ و امداد نا شفاف کاریم اٹ اتنگ ءِ پک کننگ مرے۔ اوپارے کہ اوغانستان نا الس نا امداد نا کاریم ءِ ادارہ یا ملک اس تنیا وڑاٹ کننگ کپک، دارداٹ جہانی برادری ءِ اوغان الس نا کمکاری کن مون آ بروئی مریک، اسلامی شونداری بینک تدوک آ دسمبر آن پدریسہ ہڑتوم آ کنڈآتا شونداری شریدار و امداد تروک آ ملک و ادارہ غاتون دا رداٹ سلابت کننگ ءِ۔ اوپارے کہ اوغانستان کن ہیومینٹیرین ٹرسٹ فنڈ انا رداٹ اوغانستان نا خلقی علاقہ غاتیا خاص چکار تخنگک انتئے کہ 75 درسد اوغان خلقی علاقہ غاتیٹی رہینگ انگ ءُ۔ خلقی علاقہ غاتیٹی کشاری پیدوار اٹی ودکی، مسن تا تعلیم، زالبول آتے واکدار کننگ و بجلی و ایلو بنداوی گرج آتا فراوانی ءِ اولیت تننگک۔ ہندا وڑ اوغانستان اٹی انسانی ہمدردی نا بنداو آ کمکی کاریم تیٹی نجی بشخ انا اوار مننگ ءِ پک کننگ کن ہم گام گیج کننگک۔ اسلامی شونداری بینک انا صدر پارے کہ اوغانستان نا الس نا امداد کن او آئی سی نا باسک ملک ، جہانی کمکی و شونداری ادارہ و جہانی برادری ءِ مون آ بروئی مریک۔ اسلامی شونداری بینک غٹ شریدار و جہانی برادری تون اواری اٹ اوغانستان نا الس نا امداد کن سنبرینگوک ءِ۔ اواوغانستان کن ہیومینٹیرین ٹرسٹ فنڈ و اسلامی کانفرنس تنظیم نا وزارتی دیوان نا مہمانداری آ پاکستان نا منت واری ءِ ہرفے۔
