اسلام آباد۔ 22 مارچ (اے پی پی) اسلامی کمکار تنظیم (او آئی سی ) وزرائے خارجہ کونسل دیوان نا بنائی سیشن سے شنبے نادے آ پارلیمنٹ ہاؤس اٹی بناکرے ہرانا سرحال سیوت، انصاف وشونداری کن شریداری ئسک۔ بنائی دیوان اٹی بشخ ہلنگ کن باسک ملک آتا وزیرخارجہ غاک،درملکی مہمان، مندوبین، پارلیمنٹ نا باسک و میڈیا نا نمائندہ غاک 9 بجہ غا سرمننگ نا بناءِ کریر۔ وزیرخارجہ مخدو م شاہ محمود قریشی شرفمند، شرفمند آ مہمان و شریک مندوبین تے بخیر اٹ پارے۔ وزیراعظم عمران خان 11 بجہ ءُ 15 منٹ آ قومی اسمبلی نا ہال اٹی پترینگا۔ او آئی سی نا سیکرٹری جنرل حسین براہیم طحہٰ ، چینی وزیر خارجہ وانگ یی، سعودی عرب نا وزیر خارجہ شہزادہ فیصل بن سعود السعود ، اسلامی شونداری بینک انا صدر ڈاکٹر محمد سلیمان الجاسر و او آئی سی وزرائے خارجہ کونسل نا 47 می دیوان نا چیئرمین نائیجر نا حسومی مسعود ہم اسٹیج آ وزیراعظم تون اوار ساڑی ئسر۔ بنائی سیشن نا بنا11 بجہ ءُ 18 منٹ آ تلاوت قرآن پاک آن مس ہراٹی مسلمان تا صف آتیٹی سیوت و قادر مطلق آ پکا یخین تخنگ نا اللہ تعالیٰ نا پرمان تے مون آ تخنگا۔ سیشن بناکننگ تون پاکستان نا قومی ترانہ ءِ خلنگا۔ 11 بجہ ءُ 21 منٹ آ مسلم امہ نا فائدہ غاتا رکھ اکن دہائی تا مریس جہد آ تالان او آئی سی نا سفر نا گونڈءُ ویڈیو اس نشان تننگا۔ جمہوریہ نائیجر نا وزیر خارجہ و او آئی سی وزرائے خارجہ کونسل نا 47 می دیوان نا چیئرحسومی مسعود تینا بنائی گپ و تران اٹی انتہاپسندی و اسلاموفوبیا نا دروشم اٹ امت ءِ مون تروک چیلنج آتیا سیمینار و ویبینار اڈتننگ ءِ مون آ تخا۔ تینا تقریر نا ایسر آن پد او پاکستان نا وزیر خارجہ مخدوم شاہ محمود قریشی ءِ 48 می دیوان نا کماشی ءِ باضابطہ وڑاٹ تننگ نا سلہ خلک۔ وزیر خارجہ 11 بجہ ءُ 36 منٹ آ تینا تقریر نا بناءِ کرے ہراٹی او باسک ملک آتا سیوت نا گرج آ زور شاغا۔ سعودی عرب نا وزیر خارجہ شہزاد فیصل بن فرحان السعود پاکستان نا 75 می یوم آزادی و او آئی سی وزرائے خارجہ کونسل نا 48 می دیوان نا کماشی ءِ سنبھالنگ آ پاکستان ءِ مبارکبادی تس۔ سعودی وزیر خارجہ اوغانستان اٹی امن نا دوئی کننگ و اوغانستان اٹی است ہسون انسانی تنکی ءِ توننگ کن مسلم ملک آتا کڑد ءِ مون آتخا۔ او آئی سی نا سیکرٹری جنرل حسین براہیم طحہٰ 12 بجہ ءُ 7 منٹ آ تینا تقریر نا بناءِ کرسا پارے کہ یوکرین و روس انا تنکی آن او آئی سی نا باسک ملک آتا زرگزران نا بھلا اثر اس مرتب مننگ کیک ہراکہ دنیا نا آبادی نا 28 درسد ءِ۔ 12 بجہ ءُ 47 منٹ آ اقوام متحدہ نا سیکرٹری جنرل انتونیوگوٹریش نا اسہ ویڈیو کلہو اسے چلیفنگا ہراٹی او مسلم دنیا غا امن و انسانیت نا شونداری کن سیوت و ہم آہنگی ءِ مون آ دننگ آ زور شاغا۔ قازقستان نا وزیر خارجہ علاقائی ٹولی تا کنڈآن بیان تس۔ تیونس نا وزیر خارجہ عثمان جیراندی عرب ٹولی نا کنڈآن یک بجہ ءُ 6 منٹ آ تینا تقریر نا بناءِ کرے و داہیت آ زور شاغا کہ دہشت گردی و پرتشدد انتہاپسندی اسیجائی دشمنک ءُ، ہرا مسلم ملک آتے نزوری نا گواچی کننگ ءُ۔ اوپارے کہ ننے رواداری ءِ مون آ دننگ و اپرامن مننگ نا منصفانہ مسخت آتیکن اواری اٹ کاریم کننگ نا گرج ءِ۔
