اسلام آباد۔ 22 مارچ (اے پی پی) پاک فوج انا سروک جنرل قمر جاوید باجوہ تون سعودی عرب نا وزیر خارجہ شہزادہ فیصل بن فرحان السعود اوڑدہی کرینے۔ اوڑدہی ٹی تین پہ تینی است خواہی نا امور، علاقائی سلامتی، اوغانستان نا ساڑی حالیت و ہڑتوم آ ملک آتا نیام اٹ ہڑتوم آ کنڈآتا دفاعی تعلقداری آ گپ وتران کننگا۔ پاک فوج انا شعبہ تعلقات عامہ نا رداٹ آرمی چیف دا وخت آ پارے کہ پاکستان سعودی عرب تون تینا تاریخی و برادرانہ تعلقداری تے قدر انا نظر اٹ ہرک و اسلامی دنیا ٹی اونا یکتا ہند ءِ امنا کیک۔ او آئی سی نا وزرائے خارجہ نا 48 می دیوان حوالہ ءِ ترسا آرمی چیف اودے امن و سوگوی و مون آ بروک آ چیلنج آتا ایسر اس پٹنگ نا چرجوئی ٹی جہانی برادری ءِ اسیجائی وژن و حکمت عملی اس اتنگ کن اسہ تاریخی پیش رفت اس گوندا۔ شرفمند آ مہمان اوغان حالیت آتیٹی پاکستان نا کڑد، بارڈر مینجمنٹ کن خصوصی کوشست، علاقائی سوگوی ٹی کڑد انا ستاءِ کرے و پاکستان تون ہر کہول آ سفارتی کمکاری ٹی پین گچینی کن تینا کڑد ءِ ادا کننگ نا عزم ظاہر کرے۔ اواو آئی سی نا 48 می وزرائے خارجہ کونسل نا مہمانداری آ پاکستان نا کوشست آتا خصوصی وڑاٹ ستاءِ کرے۔
