اسلام آباد۔ 22 مارچ (اے پی پی) تھنک ٹینک انسٹی ٹیوٹ آف پیس اینڈ ڈویلپمنٹ انسپاڈ نا صدر ڈاکٹر محمد طاہر تبسم او آئی سی وزرائے خارجہ کانفرنس نا ستاءِ کرسا پارینے کہ کشمیر و فلسطین نا جھیڑہ غاتا ایسری کن بیرہ قراردادآک گنج اس افس اوفتیا عملی کوشست آتا گرج ءِ، بیرہ قراردادآتیان ویل ایسر مفک اوفتیا عملدرآمد نا حکمت عملی ہم المی ءِ، شام، روہنگیا ٹی مسلمان تا کشت وخون ءِ بند کرفنگے و سعودی عرب، یمن، ترکی و ایران نا نیام اٹ بے چیٹی نا گچین ءُ ایسر اس بایدے پٹنگے۔ اسہ بیان اسے ٹی او خواست کرے کہ او آئی سی وزرائے خارجہ کانفرنس کشمیر و فلسطین نا جھیڑہ غاتا ایسری اسکان بھارت و اسرائیل تون واپاری و راجی تعلقداری تے کشکنگ نا فیصلہ ءِ کے۔ اوپارے کہ عراق، مصر، لیبیا، کویت و اوغانستان اٹی داخہ بھسکاری متوکہ اگہ اوفتیا عملی کوشست کننگاکہ او آئی سی نا گچین ملک آک بھارت و اسرائیل نا حکومت آتیا زور شاغر کہ او کشت وخون ءِ بند کیرو ڈائیلاگ نا کمک اٹ دا دیرینہ ایسر نا چاری جھیڑہ غاتے ایسر کیر۔ اوپارے کہ مسلم ملک آتا نیام اٹ بے چیٹی ءِ چٹفسا سیوت، تفہیم و کمکاری نا فضانا سخت گرج ءِ، مسلمان تا حق انا جنگ اکن پوسکن ءُ گام گیج کننگے۔ بیرہ قراردادآتیان ہچ ءُ بدلی اس بفک ہراتم اسکان اتحاد بین المسلمین کن است و جون اٹ کوشست مفک۔
