اسلام آباد۔ 22 مارچ (اے پی پی) اسلامی کمکار تنظیم (اوآئی سی ) نا وزرائے خارجہ کونسل نا 48 می اِرادے ئی دیوان سے شنبے نادے آ بنجائی دارالحکومت اسلام آباد اٹی بناکرے۔ دیوان نا سرحال ’’سیوت، انصاف و شونداری کن شریداری ‘‘ ءِ۔ دیوان اٹی او آئی سی نا باسک ملک و مبصر ملک آتا وزیر خارجہ و بڑزکو کہول آ ڈل آک بشخ ہلنگ ءُ۔ داڑے پارلیمنٹ ہاؤس اٹی مروک آ دیوان اٹی وزیراعظم عمران خان، وزیر خارجہ مخدوم شاہ محمود قریشی، اسلامی کمکار تنظیم نا سیکرٹری جنرل و باسک ملک آتا وزراء خارجہ، مندوبین و ڈل آک بشخ ہلنگ ءُ۔ وزیرخارجہ مخدوم شاہ محمود قریشی نا کماشی ٹی وزراء خارجہ دیوان اٹی مسلم امہ ءِ مون تروک ویل، جہانی حالیت، او آئی سی نا باسک ملک آتا نیام اٹ یکجہتی ، جہانی و علاقائی امن و شونداری آ سجفنگک۔ اسلامی کمکار تنظیم نا وزراء خارجہ نا کانفرنس اٹی فلسطین و مقبوضہ جموں و کشمیر نا الس تون پبی یکجہتی نا درشانی ءِ کننگک۔ دیوان اٹی اوغانستان نا حالیت آتون اوار اوار اسلاموفوبیا و چاگڑدی بدلی نا اثر آتون اوار ایلو امور آ ہم سجفنگک و دا بابت لائحہ عمل اس مون آ اتنگک۔ اِرادے ئی دیوان اٹی بھارت نا غیر کانودی کوزہ گیری ٹی جموں و کشمیر اٹی بھارت نا کنڈآن انسانی حق انا بے تک و بھلا لتاڑنگ آتا جاچ ءِ ہلنگک۔ او آئی سی وزراء خارجہ دیوان اٹی بشخ ہلوک آک یوم پاکستان نا وخت آ (پگہ) چارشنبے نادے آ پریڈ گراؤنڈ اٹی پاکستان ڈے پریڈ نا ہم مشاہدہ ءِ کیرہ، اسلامی کمکار تنظیم نا سیکرٹری جنرل حسین براہیم طحہٰ ہم اوفتے تون اوار مریک، وزرائے خارجہ نا دیوان اٹی چندی قرارداد ہم پاس کننگک۔ او آئی سی نا وزراء خارجہ نا کونسل دیوان نا ایسر آ اسیجائی اعلامیہ جاری کننگک۔ پاکستان نا دارالحکومت اسلام آباد اٹی او آئی سی نا وزراء خارجہ نا کونسل نا 78 می دیوان بھاز اہمیت تخک۔ داکان مست تدوک آ سال دسمبر اٹی اوغانستان نا حالیت آتا جاچ ءِ ہلنگ کن پاکستان نا مہمانداری ٹی اسلامی کمکار تنظیم نا وزراء خارجہ نا اسہ اہم ءُ دیوان اس اسلام آباد اٹی اڈ ہلکوسس۔
