اسلام آباد۔ 22 مارچ (اے پی پی) سعودی عرب نا وزیر خارجہ و او آئی سی سروک دیوان نا چیئرمین فیصل بن فاران السعود پارینے کہ جہانی قرارداد آتا رداٹ فلسطین نا ویل انا پرامن ایسری ءِ خوانہ، نن جموں و کشمیر نا الس نا پورو مخ تفی ءِ کینہ، کشمیر نا ویل انا انصاف اٹ ایسری کن جہانی برادری کڑد ادا کے۔ سے شنبے نادے آ او آئی سی سروک دیوان نا چیئرمین نا حیثیت اٹ دیوان آن تران کرسا اوپارے کہ او پاکستان نا منت وار ءِ ہرا او آئی سی وزرائے خارجہ نا دیوان اٹی بشخ ہلنگ آ جم و جوش اٹ بخیر کرے۔ اوپاکستان نا 75 می یوم پاکستان آ قوم و حکومت ءِ مبارکبادی ترسا پاکستان نا شونہالی و پین سرسہبی کن دعا کرے۔ اوپارے کہ جنرل اسمبلی ٹی اسلاموفوبیا نا برخلاف جہانی دے ءِ اڈتننگ نا قرارداد نا منظوری مسلم امہ نا سرسہبی ءِ۔ دا رداٹ پاکستان نا کنڈآن قرارداد پیش کننگ و او آئی سی سیکرٹریٹ و سیکرٹری جنرل نا کڑد آ اودے مبارکبادی پیش کینہ۔ اوپارے کہ اسلاموفوبیا نا برخلاف جہانی دے بین المذاہب ہم آہنگی نا مون آ دننگ اٹ کمکار مریک۔ سعودی عرب فلسطین نا ویل آ فلسطینی تا مخ تفی ءِ برجاتخک، نن جہانی قرارداد آتا رداٹ فلسطین نا ویل انا پرامن ایسری ءِ خوانہ آزاد فلسطینی ریاست اسے نا جوڑ کننگ ہموجاگہ نا الس ناحق ءِ۔ اوپارے کہ یمن اٹی حوثی ملائیشیا ءِ سلہہ غاتا فراوانی بایدے بند مرے۔ یمن نا الس ءِ انسانی بنداو تیا امداد فراوان کننگ اُن۔ اوپارے کہ نن جموں کشمیر نا الس نا پورو مخ تفی ءِ کینہ، کشمیر نا ویل انا انصاف اٹ ایسری کن جہانی برادری کڑد ادا کے۔ اوپارے کہ اوغانستان کن انسانی بنداو تیا ٹرسٹ فنڈ انا ٹہیفنگ اسہ ستاکڑزوک ءُ گام اسے۔ دا فنڈ انا کمک اٹ نقل مکانی کروک آ بندغ آتا کمک ءِ کننگ مریک۔
