وزیراعظم نا پمز ہسپتال نا پوسکن آ شعبہ حادثات و سیکٹر جی 13 ٹی پوسکن آ ہسپتال نا بنداو نا دود آن تران

اسلام آباد۔ 21 مارچ (اے پی پی) وزیراعظم عمران خان پارینے کہ پاکستان اٹی اولیکووار بیدس سندھ آن ملک انا غٹ شاری تے یونیورسل ہیلتھ کوریج نا آسراتی دُوبسنے، داوڑنا آسراتی دنیا نا شون ہلوک ملک آتیٹی ہم مفت دوئی اف، دا بے مٹ گام آن پرائیویٹ پبلک شریداری ءِ مون آ دننگک، ملک اٹی اقتصادی گچینی بس، غٹ زرگزرانی ٹک آک مثبت ہِننگ ءُ، کٹیا نا مقابلہ ٹی خڑچ آتے کم کرین و کٹیا ءِ ودفین تانکہ کس اسے نا غلامی ءِ کروئی تمپ، 1985 آن پد بنجائی دارالحکومت اسلام آباد اٹی پوسکن ءُ ہسپتال جوڑ کننگ اُن، پمز انا بورڈ آف ڈائریکٹرز نا اہم زمواری ءِ کہ او میرٹ نا پاسداری ءِ کے، حکومتی نظام اٹ میرٹ نا چٹنگ نا سوب آن وڈی خوری  ءِ تہو ملک، بورڈ آف ڈائریکٹرز نجی وڑآ سسٹم اس اتے و میرٹ آ تقرری کے۔ دوشنبے نادے آ اسلام آباد اٹی پمز ہسپتال نا پوسکن آ شعبہ حادثات و سیکٹر جی 13 ٹی 300 کٹ آتا پوسکن آ ہسپتال نا بنداو نا دود آن تران کرسا وزیراعظم عمران خان پارے کہ ہراتم او حکومت اٹ بس تو او پمز ہسپتال نا دورہ ءِ کرے و داڑے ایمرجنسی نا حالیت آتے خنا تو ہموتم آ فیصلہ کرے کہ دادے گچین کروئی ءِ انتئے کہ ہراتم ناجوڑ اس ایمرجنسی ٹی بریک تو اوڑکن غٹ آن گچین طبی آسراتی داڑے بایدے دوئی مرے۔ پمز انا ڈینٹسٹری نا بشخ گچین ءِ ولے داڑے ایمرجنسی حالیت بھاز خراب ئسک۔ اوپارے کہ نن شوکت خانم نا 2 ہسپتال آتا آرکیٹیکٹ آن پمز ہسپتال نا ایمرجنسی ءِ ڈیزین کرفینن ہرانا مچ آ خڑچہ ءِ پاکستانی پردیسیک سگانو۔ پاکستان دنیا ٹی عطیہ کروک آ بھلا قوم ءِ۔ وزیراعظم پارے کہ اینو نن مچ آ پاکستان اٹ غٹ آن آب اٹ ایمرجنسی نا بنداو ءِ تخانن، داکان بیدس جی 13 اٹی 300 کٹ آتیا تالان پوسکن آ ہسپتال نا بنداو ءِ ہم تخانن۔ 1985 آن پد اسلام آباد اٹی دا پوسکن آ ہسپتال جوڑ مننگ ءِ۔ اسلام آباد غٹ آن ترندی اٹ تالان شار ءِ۔ تدوک آ 10 سال اٹی دانا آبادی اِرا ہنداخہ مس، پوسکن آ ہسپتال جوڑ مفننگ آ مست آن ساڑی ہسپتال آتیا بھاریم و ڈاکٹر آتیا ہم زور تمک۔ اوپارے کہ دا پوسکن آ ہسپتال ہم امریکی آرکیٹیکٹ ڈیزین کرینے۔ نن کوشست کینہ کہ پاکستانی آرکیٹیکٹ آتے ہم تربیت ایتن۔ وزیراعظم پارے کہ مسہ نیم سال اٹی ساڑی حکومت الس کن ہراکاریم تے کرے تدوک آ حکومت آک کتنو۔ سندھ آن بیدس غٹ صوبہ غاتا ہنکینی تے یونیورسل ہیلتھ کوریج تننگ انگ ءِ۔ دنیا نا شون ہلوک ملک آتیٹی ہم دا آسراتی دوئی اف بلکن اوڑے پریمیم تروئی تمک، ننا داڑے دا آسراتی مفت تننگ انگءِ، ہراتم دا ڈٹ انا بناءِ کرین کہ ہمووخت آ مخلوق پاریکہ داکاریم مشکل ءِ ، مننگ کپک۔ اوپارے کہ دا آسودہی ریاست نا کنڈآ اسہ اہم ءُ گام اسے تانکہ انسانیت نا نظام مرے، نیزگارتون ہم درمان نا گچین آسراتی مرے۔ داکان مست مخلوق بیوسی ٹی ناجوڑی تا سوب آن وام ہلکرہ۔ وزیراعظم پارے کہ ہراتم آن ای سیاست اٹ بسونٹ ہموتم آن کنا ہندا تغ ئس، داکارڈ انا سوب آن داسہ شاریک ہمو ہسپتال آتیٹی ہم درمان کرفنگ کیرہ ہرافتا او بیرہ تصور ءِ کننگ کریرہ۔ وزیراعظم پارے کہ اودے ڈاکٹرز ہسپتال نا مالک ٹیل فون آ پارے کہ اولیکو وار اسہ خواری کش اسے نا ہارٹ نا جان جوڑی کارڈ آ داڑے آپریشن مسنے۔ وزیراعظم پارے کہ داکارڈ انا سوب آن داسہ نجی بشخ مون آ بریک، پرائیویٹ پبلک شریداری مریک، مر مر انگا علاقہ غاتیٹی پوسکن ءُ پرائیویٹ ہسپتال جوڑ مریک انتئے کہ مر مرانگا سرکاری ہسپتال آتیٹی ڈاکٹر آک ہنپسہ۔ ہموڑے نرس ملپک۔ وزیراعظم عمران خان تینا تران اٹی مستی پارے کہ نن داڑتون اوار اوار اسہ وڑ نصاب تعلیم رائج نا کنڈآ اہم ءُ گام اس ہرفین ہرانا کنڈآ مستین اٹ کس اس چکار کتو۔ ننا ملک انا بدبختی داڑے رائے طبقاتی نظام تعلیم ءِ، دانظام نیامی تپہ ءِ بڑز اتنگ کن الیتوکہ، انگریزی اسہ کلاس اس جوڑ مسوسس، دا اصل اٹ غلامی نا اسہ طوق اس ننا لخ اٹی تمانے۔ وزیراعظم پارے کہ نن سیرت النبی صلی اللہ علیہ و آلہ وسلم خوانفنگ نا فیصلہ کرین انتئے کہ کڑدسازی آن بیدس قوم بھلن مننگ کپک۔، مدینہ نا ریاست نا پداٹ بنداوی فلسفہ فکر انقلاب ئس، وخت اس ہم تلوار آن انقلاب بتنے، مچ آ ڈیہہ عرب بیرہ ذہن بدل کننگ نا سوب آن بدل مس ولے بدبختی اٹ پاکستان اٹی وخت اس ہم داکنڈآ کوشست ہم کننگتو۔ اوپارے کہ ہراقوم ہم نبی صلی اللہ علیہ و آلہ وسلم نا سنت آ چلینگک ہمو سرسہب مریک، او رحمت اللعالمین صلی اللہ علیہ و آلہ وسلم ئس۔ وزیراعظم پارے کہ رحمت اللعالمین اتھارٹی اس جوڑ کرینن تانکہ یونیورسٹی اسکان نا تینا چناتے نبی صلی اللہ علیہ و آلہ وسلم نا زند و اونا رغاموک آتا بارواٹ تعلیم و آگاہی تننگ کین۔ وزیراعظم پارے کہ نن ملک اٹی اقتصادی گچینی ایسون، غٹ زرگزرانی ٹک آک مثبت ہِننگ ءُ۔ اوپارے کہ پمز مچ آ پاکستان نا ہسپتال آتیکن اسہ درور اس جوڑ مننگ کیک۔ پوسکن آ جناح ہسپتال اسلام آباد 300 کٹ آتا ہسپتال اس مریک ہراٹی ایمرجنسی ٹی 27 کٹ، جنرل وارڈ اٹی 196 ، کارڈیالوجی ٹی 8، آئی سی یو ٹی 16، انڈوسکوپی ٹی 22، میٹرنٹی ٹی 5 و سرجیکل ریکوری ٹی 18 کٹ مریرہ۔ دا ہسپتال ناجوڑ آتے آب اٹ طبی آسراتی تا فراوانی نا اسہ پوسکن آ ازباب آتیان شُپ ہسپتال اس مریک ، داکان بیدس پمز اٹی 200 کٹ آتا ایکسیڈنٹ و ایمرجنسی سینٹر اٹی ایکیوٹ کیئر نا 22 ، فاسٹ ٹریک نا 44، ٹراما نا 27 ، ابزرونا 51 ، ٹرائی ایج نا 6 و متفرق 3 کٹ مریرہ۔