وزیرخارجہ شاہ محمود قریشی نا او آئی سی نا سیکرٹری جنرل حسین براہیم طحہٰ تون اوڑدہی

اسلام آباد۔ 21 مارچ (اے پی پی) وزیرخارجہ شاہ محمود قریشی پارینے کہ اوغانستان نا حالیت خاص وڑاٹ انسانی تنکی او آئی سی نا پدریسہ چکار کرزک۔ داہیت ءِ او دوشنبے نادے آ او آئی سی نا سیکرٹری جنرل حسین براہیم طحہٰ تون دوشنبے نادے آوزارت خارجہ ٹی اوڑدہی ٹی پارے۔ سیکرٹری خارجہ سہیل محمود، اسپیشل سیکرٹری خارجہ رضابشیر تارڑ و وزارت خارجہ نا سینئر آفیسر آک ہم داوخت آ ساڑی ئسر۔ وزیرخارجہ پارے کہ او آئی سی وزراء خارجہ کونسل نا چل ءُ ہشت می دیوان نا اڈتننگ پاکستان کن اسہ خاص ءُ موقع اسے انتئے کہ نن تینا آجوئی نا 75 می سال ءِ اڈتننگ اُن۔ وزیرخارجہ مقبوضہ جموں وکشمیر اٹی تنظیم تا سرجزآتا بارواٹ سینئر عہدیدار آتا دیوان اٹی پیش کروک خصوصی رپورٹ نا ستاءِ کرے و پارے کہ مقبوضہ جموں و کشمیر نا حالیت آک تشویشناک ءُ، وحشیانہ فوجی کوزہ نا رداٹ انسانی حق انا حالیت آتے خراب کننگ آن بیدس بھارت مقبوضہ علاقہ ٹی آبادیاتی کچ اٹ بدلی ٹی لگوک ءِ۔ شاہ محمود قریشی اقوام متحدہ ٹی اسلاموفوبیا آ ساڑی آ قرارداد نا منظوری نا ستاءِ کرے و پارے کہ دا ہیت خوشی نا سوب ءِ کہ پاکستان نا گام ءِ او آئی سی و اونا باسک ملک آتا کنڈآن پورو مخ تفی دوئی ئسک۔ اوپارے کہ اسلاموفوبیا غا خصوصی ایلچی مقرر کننگ آن اسلاموفوبیا نا ودوک آ کچ اتون مون تننگ اٹ کمک رسینگک۔ اوپارے کہ اوغانستان نا حالیت خاص وڑاٹ انسانی تنکی او آئی سی نا پدریسہ چکار کرزک۔ اومیت ءِ اوغانستان کن ہیومینٹیرین ٹرسٹ فنڈ انا آپریشنل بناآن اوغان الس ءِ مون تروک انسانی چیلنج آتون مون تننگ اٹ کمک رسینگک۔ شاہ محمود قریشی پارے کہ 19 دسمبر 2021 آ او آئی سی وزراء خارجہ کونسل نا ہلہلہ ئی دیوان اٹی کروک آ فیصلہ غاتا رداٹ ننے جوان بجٹ و لاجسٹک سپورٹ نا کمک اٹ کابل اٹ او آئی سی نا ساڑی گری و خصوصی ایلچی نا دفتر ءِ سوگو کننگ نا گرج ءِ، پاکستان نا چیئرمین شپ اٹی نن او آئی سی ءِ پین متحرک کننگ کن سیکرٹریٹ تون فعال وڑاٹ رابطہ ءِ استوار تخنہ، نن او آئی سی چیئرنا وڑاٹ تینا مینڈیٹ ءِ پورو کننگ کن سیکرٹریٹ نا پدریسہ مخ تفی نا خواہندار ءِ۔