اوغانستان کن ہیومینیٹیرین ٹرسٹ فنڈ اس ٹہیفنگ نا مسخت اوغان الس کن جہانی انسانی امداد نا کچ ءِ ودفنگ کن ننا اجتماعی کوشست ءِ، وزیرخارجہ مخدوم شاہ محمود قریشی

اسلام آباد۔ 21 مارچ (اے پی پی) وزیرخارجہ مخدوم شاہ محمود قریشی پارینے کہ اوغانستان کن ہیومینیٹیرین ٹرسٹ فنڈ اس ٹہیفنگ  نا مسخت اوغان الس کن جہانی انسانی امداد نا کچ ءِ ودفنگ کن ننا اجتماعی کوشست ءِ، انسانی تنکی نا رداٹ اوغان الس ءِ ننا دمدستی چکار نا گرج ءِ۔ دوشنبے نادے آ وزارت خارجہ ٹی اوغانستان کن ہیومینیٹیرین ٹرسٹ فنڈ اکن چارٹر آ دستخط نا دود آن تران کرسا وزیر خارجہ پارے کہ اسلام آباد اٹی اڈ ہلوک وزرائے خارجہ نا کونسل نا 17 می اہم دیوان اٹی اسلامی شونداری بینک انا کنڈآن ہیومینیٹیرین ٹرسٹ فنڈ اس ٹہیفنگ  نا فیصلہ کننگا۔ بینک آن خواست کننگاسس کہ او 2022 نا اولیکو سہ ماہی اسکان فنڈ ءِ فعال کے۔ اوپارے کہ بینک تینا مینڈیٹ ءِ گچین وڑاٹ تخوک آ مد انا تہہ ٹی پورو کرینے، ٹرسٹ فنڈ انا چارٹرکافی لچکدار ءِ، ہراڑآن او آئی سی سسٹم نا پیشن آن عطیہ غاتا موکل ملک۔ وزیرخارجہ پارے کہ دا سفت نا قابل ہیت اسے ہنداوڑ جہانی عطیہ تروک آتا دنگ ءِ ودفنگ اٹ کمک کیک۔ اونا پاننگ ئس کہ ٹرسٹ فنڈ انا مسخت اوغانستان ءِ انسانی امداد سرکننگ کن اسہ میکانزم اسے نا وڑاٹ کاریم کننگ ءِ۔ دا چرجوئی ٹی او آئی سی نا باسک ملک آتا کڑد اہم مریک، گمان ءِ کہ او آئی سی نا باسک ملک، اسلامی مالیاتی ادارہ، عطیہ تروک و ایلو جہانی شریدار آک دا ٹرسٹ فنڈ اٹی تینا عطیہ غاتا کمک اٹ شمولیت کیرہ۔ وزرائے خارجہ کونسل نا 48 می دیوان نا چیئرمین نا وڑاٹ ای بشخ ہلوک آتیان فنڈ اٹ بشخ شاغنگ نا خواست کیوہ۔ وزیرخارجہ پارے کہ دا خصوصی ٹرسٹ فنڈ اوغان الس کن جہانی انسانی امداد نا کچءِ ودفنگ کن ننا اجتماعی کوشست اسے، نن غٹ دا گام ءِ سرسہبی آن ہمکنار کننگ کن بایدے پبی کوشست کین۔