تحریک انصاف و وزیراعظم عمران خان ساڑی آ تنکی آن پین واکدار مرسا پیش تمرہ، ڈاکٹر شہباز گل

اسلام آباد۔ 21 مارچ (اے پی پی) وزیراعظم نا ترجمان و خصوصی کمکار ابلاغ ڈاکٹر شہباز گل پارینے کہ تحریک انصاف و وزیراعظم عمران خان ساڑی آ تنکی آن پین واکدار مرسا پیش تمرہ، وونٹءِ شرف ایتبو نا نعرہ خلوک آک وونٹ آتا ہلنگ نا بناءِ کرینو، ننا پن آ جعلی اکاؤنٹ جوڑ کرسا پاک فوج انا برخلاف گالم گلوچ کروک آتا سرجم ءُ رپورٹ اس تیار کرسا ایف آئی اے آ گدریفنگ اُن، پی ٹی آئی نا اسہ کارندہ اس ہم عدلیہ، فوج و الس کن گالی گلوچ کپک، پاک فوج ننا گمر و کاٹم نا تاج ءِ، او قوم انا سیم تا رکھوک ءِ، سپریم کورٹ ءِ وفاداری بدل کننگ نا ریفرنس آ فیصلہ کروئی ءِ کہ انت داڑے ضمیر سودا مرسا کیک، تحریک انصاف نا منحرف باسک آک اگہ توبہ کرسا پدی بریرہ تو اوفتے خمب کینہ۔ دوشنبےنادے آ میڈیا تون گپ وتران کرسا اوپارے کہ پاکستان نا آئین ہر شاری ءِ پرامن وڑاٹ الس اسکان تینا توار ءِ سرکننگ نا حق ایتک۔ بلاول بھٹو ساڑی ہی ٹی لانگ مارچ کرے ہرا ڈی چوک آ ایسر مس۔ ن لیگ نا ہراڑے است کرے ہموڑے جلسہ کرے، داسہ تحریک انصاف دا کننگ ءِ تو سرمایہ اٹ ضمیر ہلوک آک اودے بے چیٹی پاننگ ءُ۔ اپوزیشن تون زر انا وخت اس کہ عمران خان تون الس نا طاقت ءِ۔ اوپارے کہ اپوزیشن اول جلسہ نا پڑو کرے ولدا رزاک اٹ پنجاب اٹ اسہ جماعت اسے نا سیکرٹری 27 مارچ آاسلام آباد آ سرمننگ نا کارندہ غاتے چٹھی اس نوشتہ کرے۔ عمران خان الس تون ہیت کننگ خواہک وخت اس کہ بولی خلوک آتے الس نا خلیس ءِ، اول اوفک جلسہ نا پڑو کریر ولے اوکان پد اوفک میڈیا غا ہندن ءُ ماحول اس جوڑ کریر کہ بے چیٹی تالان مریک۔ اوسوج کرے کہ بے چیٹی انت اکن تالان مریک، اسلام آباد داخس بھلن ءِ اسہ جاگہ غا تحریک انصاف و ایلو جاگہ غا اپوزیشن جلسہ کے، کل گڑا پاش آن پاش پیدوار مریک۔ بنداوی حق آن کس اسے توننگ مفک۔ اوپارے کہ ننا بدبختی ءِ کہ ننے سچائی آن ویل ءِ۔ نن حبیب جالب ءِ ہم زندان اٹ شاغسا کرین، اگہ کس اس ضمیر ءِ سودا کے تو انت نن اوڑآ ہیت کپن اگہ کس اس راست ہیت کے اوڑآن ننے ویل ءِ۔ دامنافقت ءِ۔ ہندا اینو ننا راج ءِ داتسکان ایس۔