اسلامی کمکار تنظیم نا وزراء خارجہ کونسل نا دیوان نا چرجوئی ٹی ڈل آتا بننگ برجا

پاکستان نا عالم اسلام اٹی پنی ءُ ہند اسے، حسین ابراہیم طحہٰ

اسلام آباد۔ 21 مارچ (اے پی پی) اسلامی کمکار تنظیم (او آئی سی ) نا وزراء خارجہ کونسل نا 48 می دیوان نا چرجوئی ٹی اسلامی باسک ملک آتیان ڈل آک اسلام آباد سرمننگ نا بناءِ کرینو، مصر انا وزیر خارجہ 24 سال آن پد پاکستان آ بسنے وخت اس کہ اسلامی کمکار تنظیم نا سیکرٹری جنرل حسین ابراہیم طحہٰ ہم دوشنبے نا سہب اتون اسلام آباد آ سرمسنے۔ دوشنبے نادے آ اسلام آباد بالی پٹ آ وزیر مملکت حوالکاری و شینکاری فرخ حبیب و چیئرمین پاکستان علماء کونسل و نمائندہ خصوصی وزیراعظم پاکستان بین المذاہب ہم آہنگی و دے ٹک نیامی حافظ محمد طاہر محمود اشرفی ئسک اوفتے بخیر کریر۔ داوخت آ میڈیا تون گپ وتران کرسا اسلامی کمکار تنظیم نا سیکرٹری جنرل حسین ابراہیم طحہٰ پارے کہ پاکستان نا عالم اسلام اٹی پنی ءُ ہند اسے، پاکستان اٹ منہ تُو اٹی اِر اوار عالم اسلام نا وزراء خارجہ نا بننگ پاکستان نا ہند ءِ پاش کیک۔ اوپارے کہ وزراء خارجہ کونسل نا 48 می دیوان عالم اسلام نا ویل، امت مسلمہ نا حالیت و جہانی دنیا نا حالیت آتیا اہم فیصلہ کیک۔ مصر انا وزیرخارجہ سامع شکری پارے کہ پاکستان ومصر اِرا ایلم ملک ءُ، پاکستان مصر انا تعلقداریک بھاز سوگو ءُ، و انتہاپسندی ، دہشت گردی نا چٹفنگ و امت مسلمہ نا وحدت و سیوت کن پاکستان، مصر اواری اٹ کاریم کیرہ، چیئرمین پاکستان علماکونسل و نمائندہ خصوصی وزیراعظم پاکستان حافظ محمد طاہر محمود اشرفی پارے کہ اسلامی کمکار تنظیم نا دیوان مچ آ قوم اکن گمر نا قابل ءِ، پاکستانی قوم تینا شرفمند آ مہمان تے بخیر اٹ پاہک، اوپارے کہ اسلام آباد آن مظلوم کشمیری، فلسطینی تا ہیت مریک و امت نا ویل آتیکن عملی لائحہ عمل اس ملک، اسہ سوج اسے نا ورندی ٹی حافظ محمد طاہر محمود اشرفی پارے کہ اسلامی کمکار تنظیم نا مہمان حزب اختلاف نا ہم مہمانک ءُ، اوفتا کنڈآن مثبت رویہ مون آ بسنے، حزب اختلاف اسلامی کمکار تنظیم نا بابت ہرا اعلامیہ ءِ جاری کرینے او سہی کنڈآ گام اسے۔