پی ٹی آئی نا کارندہ غاک تینا جمہوری حق ءِ کاریم اٹ اتسا پرامن برانز کریرہ، سندھ حکومت و پولیس اوفتے دمدستی یلہ کے، وزیر مملکت حوالکاری و شینکاری فرخ حبیب

اسلام آباد۔ 21 مارچ (اے پی پی) وزیر مملکت حوالکاری و شینکاری فرخ حبیب پارینے کہ پی ٹی آئی نا کارندہ غاک تینا جمہوری حق ءِ کاریم اٹ اتسا پرامن برانز کریرہ، پیپلزپارٹی اسہ کنڈآ جمہوریت نا چیمپیئن مننگ نا دعویٰ ءِ کیک تو ایلو کنڈآ پرامن برانز ءِ سگنگ کپک، سندھ حکومت و پولیس دمدستی وڑاٹ پی ٹی آئی کارندہ غاتے یلہ کے۔ داخیال آتا درشانیءِ دوشنبے نادے آ وزیر مملکت حوالکاری و شینکاری فرخ حبیب سندھ اٹی پی ٹی آئی کارندہ غاتا دزگیری تیا گڑتی نا درشانی ءِ کرسا کرے۔ فرخ حبیب پارے کہ سندھ حکومت نا غیر جمہوری رویہ غٹ آ پاش مسنے، پیپلزپارٹی نا مارچ پنجاب آن مرسا اسلام آباد اسکان سرمس ولے اسہ جاگہ اس ہم مقدمہ یا اڑاند اس الوکہ۔ وزیر مملکت پارے کہ پیپلزپارٹی شاید سیاسی قدر ءِ ہم گیرام کرینے، داامر ءُ جمہوری حکومت اسے ہر اپرامن برانز کروک آتا برخلاف مقدمہ نوشتہ کننگ ءِ۔ وزیر حوالکاری پارے کہ ہراوڑ نن نیمہ غا سندھ پولیس پی ٹی آئی ناکارندہ غاتا دزگیری کن چھاپہ خلک داوڑنا کسبی ڈوہدار زموار آتا سرکوبی کن کریکہ تو ڈوہدار تا مون ءِ توریکہ، داحرکت آ بلاول ءِ ورندی تروئی تمک، پی ٹی آئی ءِ داسہ اوفتے جمہوری قدر ءِ ہم ہیل تروئی تمک۔