اسلام آباد۔ 18 مارچ (اے پی پی) صدر مملکت ڈاکٹر عارف علوی زرکاری نا مون آ دننگ و واپاری سرجزآتے ودفنگ کن کاروبار اٹی آسانی ودنگ کننگ و اصلاحات نا گرج آ زور شاغسا پارینے کہ واپاری سرجزآتے ودفنگ کن ٹیکنالوجی نا زیات آن زیات کاریم اٹ اتنگ المی ءِ، صنعت کارآتا سلابت آن ٹیکسٹائل انڈسٹری نا بحالی ممکن مننگ کرینے۔ داخیال آتا درشانی ءِ او جمعہ نادے آ ایوان صدر اٹی ’’آسان کاروبار پروگرام ‘‘ نا بابت اڈ ہلوک دود آن تران کرسا کرے۔ دود اٹی وزیراعظم نا سلاہکار واپار و زرکاری عبدالرزاق داؤد، بورڈ آف انوسٹمنٹ نا چیئرمین محمد اظفراحسن، درملکی سفارتکار، پوریاگر تنظیم تا نمائندہ و بڑزکو آفیسر آک بشخ ہلکر۔ صدر مملکت پارے کہ ملک اٹی زرکاری نا مون آ دننگ کن کاروبار اٹ آسانی ودی کننگ اُن، کاروبار اٹی آسانی کن رویہ غاتیٹی بدلی اتوئی مریک، ملک اٹی زرکاری و کاروبار آن روزگار نا پوسکن ءُ وارخواہی ودی مریک۔ ڈاکٹر عارف علوی داوخت آ کاروبار نا بارواٹ پورٹل نا بنانا ستاءِ کرسا پارے کہ داڑآن پوریاگر و زرکارآتے پاکستان اٹ واپار نا بارواٹ آگاہی دوئی مریک۔ صدر مملکت پارے کہ واپاری سرجز آتے ودفنگ کن ٹیکنالوجی نا زیات آن زیات کاریم اٹ اتنگ المی ءِ، کاروبار اٹی آسانی کن پین گام گیج کروئی مریک۔ اودود انا اڈتننگ آ بورڈ آف انوسٹمنٹ و ایلو ادارہ غاتے مبارکبادی ترسا پارے کہ قومک اصلاحات آن شون ہلیرہ۔ اوپارے کہ ٹیکنالوجی نا کاریم اٹ اتنگ آن ملک ءِ فائدہ مریک، زالبول آتے ہم ڈیجیٹل سیکٹر اٹ اوار کننگ انگ ءِ۔ صدر مملکت پارے کہ صوبائی حکومت آک داڈٹ آعملدرآمد کن بورڈ آف انوسٹمنٹ تون پورو کمک کرینو اہرا اسہ گچین ءُ گام اسے۔ وزیر مملکت و چیئرمین بورڈ آف انوسٹمنٹ محمد اظفراحسن دود آن تران کرسا پارے کہ بورڈ آف انوسٹمنٹ کاروباری چاگڑد ءِ سازگار کننگ کن چندی گام گیج کرینے، اسہ سد آن زیات اصلاحات آ عملدرآمد کننگانے ہراڑآن پاکستان اٹ زرکاری کن سازگار چاگڑد اس جوڑ کننگ اٹ کمک رسینگک، بنجائی و صوبائی محکمہ غاتون 167 اصلاحات آ سجفنگا، جم وڑاٹ 75 ادارہ غاتیٹی 115 اصلاحات آ عملدرآمد کننگا ہراڑآن 30 آن زیات بشخ آتے فائدہ دوئی مسنے ہراٹی فوڈ پراسیسنگ، جان جوڑی نا بشخ، شمسی توانائی نا کاروبار، ازباب جراحی جوڑ کروک آ بشخ آن بیدس تعمیرات و سیل و سوات نا بشخ آک اوار ءُ۔ وزیراعظم نا سلاہکار واپار عبدالرزاق داؤد پارے کہ حکومت ملک انا اقتصادی و راجی شونداری کن پبی گام گیج کننگ ءِ۔
