اسلام آباد۔ 18 مارچ (اے پی پی) وزیر مملکت حوالکاری و شینکاری فرخ حبیب پارینے کہ سندھ ہاؤس ءِ نیلام گھر اس جوڑ کننگانے، مسٹر فراڈیہ غاک مچ ءُ، دُزی لٹ وپل نا پیسہ غاک دافتے تون ئسر، سینیٹ الیکشن اٹ قومی اسمبلی نا باسک آتا ضمیر ءِ ہلنگاکہ، ویڈیو ہم ساڑی ءِ، الیکشن ایکٹ پیدوار ءِ کہ ووٹراسے پیسہ غاتا کمک اٹ ہلنگ مفک، الیکشن کمیشن تون موقع اس بسنے کہ او دادے چٹفنگ کے۔ داخیال آتا درشانی ءِ وزیر مملکت حوالکاری و شینکاری فرخ حبیب جمعہ نادے آ الیکشن کمیشن نا پیشن بنجائی پارلیمانی سیکرٹری کانود و انصاف ملیکہ بخاری تون اوار میڈیا تون گپ وتران کرسا کرے۔ فرخ حبیب پارے کہ این ایف سی نا مد اٹی سندھ حکومت 2000 ارب ایس درے ولے ہراڑے کاریم اٹ اتنگار دانا سماہی اف، ہرا کونسلر مننگ کتوکہ او ٹکٹ کن عمران خان نا نت تیا تولوک ئسک، الیکشن کمیشن یوسف رضاگیلانی نا برخلاف کیس انا ہم فیصلہ ءِ کے ووونٹ انا ہلنگ و بہاکننگ ءِ دمدستی وڑاٹ تورے، نن ابیسلوٹلی ناٹ پارسا غلطی اس کتون، دانا بھرم ءِ کُننگ کن تیار اُن، کیپٹن ڈٹ کر مقابلہ ءِ کیک، اسہ وڑنا ہم بلیک میلنگ اٹ بفک و نئے کمپرومائز کیک ، وزیر مملکت پارے کہ اینو غٹ دُزآک اسہ کنڈآ و عمران خان اوفتا مون آ سوگو سلوک ءِ، ہراتم سیوت اس جوڑ مریک تو غٹ ءِ اوار ہلسا کاہک، نن پاکستان نا جمہوریت ءِ نیلام گھر اس جوڑ مننگ کن الیپنہ، پبی مزاحمت کینہ و اڑاند مرسا سلنہ، آرٹیکل 63 اے پیدوار ءِ، کانود داخاطرآن جوڑ کننگ کہ اونا خلیس مرے، مخلوق کانود ءِ پرغپ، اگہ اوفتا ضمیر ہنداخہ بش مسنے تو نیلام گھر آن پیشن پیش تمر و دُوارہ گچین کاری کرسا ہرر اوفتے تون اخس الس ارے۔ داوخت آ پارلیمانی سیکرٹری کانود و انصاف ملیکہ بخاری پارے کہ الیکشن کمیشن نا مون آ ہرا کیس ءِ او عام اف، اسہ تاریخ اس نوشتہ کننگءِ ، اولیکو وار ضمیر فروشی نا عمل الس نا مون آ بسنے، الیکشن کمیشن اہم آئینی ادارہ، الس نا وونٹ و جمہوری عمل نا رکھوک ءِ، گیلانی نا وکیل داسہ دا پارے کہ ویڈیو ہرا مون آ بس او ننا الوکہ، الیکشن کمیشن آن خواست ءِ کہ دا اہم ءُ موڑ اسے ، آئینی ادارہ ءِ کاریم اسے کن جوڑ کننگانے، داوخت ءِ کہ پارلیمنٹ نا باسک آ ک ضمیر ءِ سوداکیرہ تو از خود نوٹس ہلسا اوفتے سزا تننگے۔
