اسلام آباد۔17مارچ (اے پی پی): تہی کارانی وزیر شیخ رشید احمد ءَ گشتگ کہ شہباز شریف ءَ آیوکیں پنچ سالانی ھاترءَ راجی حکومت جوڑ کنگ ءِ آئیڈیا داتگ ء ُ راج ءِ دیما پدر بوتگ، گڑی ءَ آئی ءِ گپ دیما اَتک، راجی حکومت ءَ پد اپوزیشن ٹیکنوکریٹس ءِ سرءَ جوڑ بوتگیں حکومت جوڑ کنگ ءِ لوٹ کتگ، ملک ءِ تہا امنء ُایمنی جوڑ تہی کارانی وزارت ءِ زمہ واری اِنت، پولیس ءَ ناشرکاری ءِ حلاپ ءِ جنگ ءَ بے مٹیں قربانی داتگ۔ اے گپ آئی ءَ پنچ شمبے ءِ روچءَ نیشنل پولیس کانفرنس ءَ پد میڈیا ءَ گوں گپ ء ُتران کنان ءَ کتگ۔ تہی کارانی وزیر ءَ گشتگ کہ مزن وزیر عمران خان سوبمند بیت ء ُ آئی ءِ حلاپ ءَ نااوستی تحریک پروش وارت۔ آئی ءَ گشتگ کہ مزن گس ء ُ فیڈرل لاجز ءِ حفاظت ایف سی ء ُ رینجرز کنت۔ آئی ءَ گشتگ کہ پاکستان تحریک انصاف 27 مارچ ءَ ڈی چوک ءَ جلسہ کنت وہدے کہ اپوزیشن ءَ ہم 25 مارچ ءَ جلسہ کنگءِ منصوبہ جوڑ کتگ۔بنجاہی وزیر ءَگشتگ کہ حال رستگ کہ سندھ گس ءَ 12 مردم نندوک اَنت، سندھ گس ءَ قانود جوڑ کنوکانی بہا ء ُ سیم ءِ یک جتائیں کیس اِت۔ آئی ءَ گشتگ کہ مزن وزیر عمران خان کوہ ءِ وڑءَ اوشتاتگء ُ محکم اِنت۔ پولیس فورس ءَ را دادء ُ سلام پیش کتگ ء ُ آئی ءَ گشتگ کہ پولیس ءَ بازیں جیڑہ ءُجنجالانی بوہگءَ ابید ہم وتی فرض پیلو کتگ۔ آئی ء گشتگ کہ پولیس فورس ءَ را جدید ٹیکنالوجی دیئگ بوہگ ءَ اِنت۔
