اسلام آباد۔ 17 مارچ (اے پی پی) وزیرخارجہ مخدوم شاہ محمود قریشی تون نائیجیریا نا وزیر دفاع میجر جنرل (ر) بشیر صالحی مگاشی پنچ شنبے نادے آ وزارت خارجہ ٹی اوڑدہی کرے۔ وزیرخارجہ پارے کہ پاکستان و نائیجیریا نا نیام اٹ ودوک آ دفاعی کمکاری است جمی نا سوبءِ۔ تدوک آ سال پاکستانی جے ایف تھنڈر ہوائی جنگی جہاز آتا نائیجیریا آ گدریفنگ بھاز جوان ءُ شگون اسے۔ شاہ محمود قریشی پارے کہ نائیجیرین فوجی تے پاکستان اٹ انسداد دہشت گردی نا تربیت نا فراوانی ننا دفاعی تعلقداری تا سوگوی نا درشانی ءِ۔ وزیرخارجہ پاکستان و نائیجیریا نا نیام اٹ انسداد دہشت گردی و بارڈر مینجمنٹ و سرویلنس نا بابت مفاہمت نامہ غا زوت دستخط نا گرج آ زور شاغا وپارے کہ نن ہڑتوم آکنڈآتا سیاسی سلابت، سفارتی و سرکاری پاسپورٹ ہولڈر آتیکن ویزانا چٹفنگ نا بابت زیرالتوا مفاہمت نامہ غاتے زوت گڈیکو دروشم اس تننگ نا خواہندار اُن۔ وزیرخارجہ پارے کہ نن نائجیریا نا صدر محمد بوہاری ءِ پاکستان اٹ زوت بخیر اٹ پاننگ نا چاری اُن۔
