اسلام آباد۔ 17 مارچ (اے پی پی) وزیرخارجہ مخدوم شاہ محمود قریشی تون آسٹریا نا اونا ہم منصب الیگزینڈر شلنبرگ پنچ شنبے نادے آ وزارت خارجہ ٹی اوڑدہی کرے۔ ترجمان دفترخارجہ نا رداٹ وزیرخارجہ پارے کہ پاکستان آسٹریا تون تینا تعلقداری تے بھاز اہمیت ایتک۔ پاکستان آسٹریا ءِ یورپی یونین نا اہم ءُ ملک اس تکک۔ شاہ محمود قریشی پارے کہ دورہ غان ہڑتوم آ کنڈآتا تعلقداری تے پین سوگو کننگ اٹ کمک رسینگک۔ مخدوم شاہ محمود قریشی پارے کہ ساڑی ہی ٹی وزیراعظم آسٹریا نا چانسلر کارل نیہمرا تون گپ وتران کرے و ہڑتوم آ کنڈآتا تعلقداری نا چندی جہت آتیا گپ وتران کرے۔ اوپارے کہ پاکستان و آسٹریا نا نیام اٹ ہڑتوم آ کنڈآتا واپار اٹ ودکی نا بھلو گمان اس ساڑی ءِ۔ آسٹریا نا کمپنی تیکن پاکستان اٹ قابل تجدید توانائی، سیل و سوات، ہاؤسنگ ، کشت وکشار و انفارمیشن ٹیکنالوجی نا بشخ آتیٹی زرکاری نا گچین ءُ وارخواہی اس ساڑی ءِ۔ سی پیک نا خصوصی اقتصادی زون ، آسٹریا نا زرکارآتیکن پرکشش آسراتی و خراج آتا اِلنگ نا رداٹ زرکاری نا پرکشش وارخواہی ساڑی ءِ۔ شاہ محمود قریشی پارے کہ ننے اومیت ءِ کہ آسٹریا داسال انا ایس پی پلس سٹیٹس نا چارمیکو اِراسال انا جاچ اٹی پاکستان نا مخ تفی ءِ برجاتخک۔ پاکستان و آسٹریا نا نیام اٹ تکنیکی و کسبی بشخ آتیٹی سوگو رابطہ ساڑی ءِ۔ وزیرخارجہ پاکستان نا سیکورٹی حالیت آتیٹی نمان گچینی نا رداٹ سفری ایڈوائزری آ مثبت نظرثانی نا خواست کرے و پارے کہ پاکستان دا ہیت آ یخین تخک کہ جہانی برادری نا اوغانستان تون تعمیری سفارتی و سیاسی رابطہ غان پائیدار امن و سوگوی نا کوشست آتے مون آ دننگ ملک۔ اوپارے کہ پاکستان اوغانستان آن سفارتکار، جہانی تنظیم تا نمائندہ، آئی این جی اوز و میڈیا پرسن تا پیشن کشنگ کن ہرممکن کمک فراوان کرے۔ ننے اوغانستان اٹی انسانی المیہ ءِ توننگ کن تینا کوشست آتے ہم گرنچ کننگ نا گرج ءِ۔ وزیرخارجہ آسٹرین ہم منصب ءِ مقبوضہ جموں وکشمیر اٹی برجا انسانی حق انا بھلا خلاف ورزی تیان معلومدار کرے۔ 5 اگست 2019 نا بھارت نا غیرکانودی و اسہ کنڈی گام گیج آن پد مقبوضہ جموں وکشمیر اٹی انسانی حق انا حالیت آک پدریسہ خراب مرسا ہِننگ ءُ۔ شاہ محمود قریشی پارے کہ 9 مارچ آ بھارت نا کنڈآن ننا فضائی دنگ انا اسُل خلاف ورزی، جہانی اصول و ایوی ایشن سیفٹی پروٹوکول آن چپ ءِ۔ نن گڑتی اتون یوکرین اٹی پیش رفت آ نظر تخانن۔ نن دشمنی نا چٹفنگ، انسانی ہمدردی نا راہداری تا جوڑ کننگ و خیالداری، انسانی امداد نا فراوانی و سفارتی ایسر کن پدریسہ کوشست آتیا اہمیت آ زور شاغانن۔ آسٹرین وزیرخارجہ جم و جوش اٹ بخیر کننگ و پرخلوص مہمانداری آ وزیرخارجہ مخدوم شاہ محمود قریشی نا منت واری ءِ ہرفے۔
