اسلام آباد۔ 17 مارچ (اے پی پی) بنجائی وزیر تعلیم و کسبی تربیت شفقت محمود پارینے کہ اسہ وڑ قومی نصاب نئے بیرہ ملک انا تعلیمی نظام اٹ تقسیم ءِ چٹفک بلکن طالب علم آتے بریبر نا وارخواہی فراوان کننگ اٹ ہم کمکار مریک۔ فیڈرل بورڈ آف انٹرمیڈیٹ اینڈ سیکنڈری ایجوکیشن نا پوزیشن ہولڈر طالب علم آتیٹی اعزاز و انعام آتا بشخنگ نا دود آن تران کرسا اوپارے کہ اسہ وڑ قومی نصاب مہالو آن کلاس 1 آن 5 اسکان لاگو کننگانے، کلاس 6 آن 8 اکن اسہ وڑ نصاب داسال درستی راستی کرفنگک وخت اس کہ کلاس 9 و 10 اکن دا بروک آ سال نافذ مریک۔ اوپارے کہ جہانی طرز عمل آن چپ ملک اٹی انگریزی میڈیم، اردو میڈیم و دینی مدرسہ غاتا دروشم اٹ 3 تعلیمی نظام ساڑی ءُ ولے اسہ وڑ قومی نصاب دا پرخ ءِ چٹفک انتئے کہ دا ساڑی حکومت نا بنداوی ہدف مسنے۔ اوپارے کہ وزارت تعلیم اسہ وڑ قومی نصاب نا نفاذ اٹی مون تروک مشکل آتا مون ءِ توننگ کن ہم کوشست کننگ ءِ۔ بنجائی وزیر پوزیشن ہولڈر طالب علم آتون اوار اوار اوفتا لمہ و باوہ و استاد آتے ہم مبارکبادی تس و تعلیم تون اوار اوار امتحانی نظام اٹ اصلاحات درستی راستی کرفنگ آ بنجائی تعلیم بورڈ انا ستاءِ کرے۔ اوپارے کہ مچ آ دنیا ٹی پاکستان انٹر نیشنل اسکول آتون اوار کم و ود 2،652 تعلیمی ادارہ بنجائی تعلیم بورڈ اتون گنڈوک ءُ و حکومت اولیکو نیشنل سکلز یونیورسٹی اس ہم جوڑ کرینے ہراڑے 600 طالب علم چندی بشخ آتیٹی کسب نا تربیت دوئی کننگ ءُ۔ داکان مست وزیرتعلیم سیکرٹری تعلیم ناہید درانی تون اوار 2020 و 2021 سیشن نا سیکنڈری اسکول سرٹیفکیٹ و ہائر سیکنڈری اسکول سرٹیفکیٹ ناامتحان تیٹی نمان پوزیشن دوئی کروک آ طالب علم آتیٹی ایوارڈز و انعام بشخا۔ اولیکو پوزیشن ہولڈر آتے گولڈ میڈل تننگا وخت اس کہ ارٹ میکو و مسٹ میکو نمبر آ بروک آتے بالترتیب چاندی و کانسی نا میڈل آتیان بیدس نمان پوزیشن دوئی کروک آ غٹ طالب علم آتے لیپ ٹاپ ، سرٹیفکیٹس و نغد انعام تننگا۔ داکان مست بنجائی تعلیمی بورڈ انا چیئرمین قیصر عالم حاضرین تے بورڈ انا کنڈآن مچ آ ملک اٹی برجاتعلیمی و امتحانی اصلاحات آن معلومدار کرے۔ اوپارے کہ بورڈ غٹ امتحانی ہند آتا جی آئی ایس میپنگ تون اوار اوار 2 سالانہ امتحان ہم درستی راستی کرفینے۔ اوپارے کہ طالب علم آتے ماڈل و پیپرز نا 3 سیٹ و اوفتا ایسر مروک کاپی تننگک۔ پین دا کہ پرچہ غاتا ای مارکنگ درستی راستی کرفنگ تون اوار اوار کمپیوٹر آ مبنی امتحان نا اسہ پائلٹ پروجیکٹ اس ہم دا سال بناکننگک۔
