اسلام آباد۔ 16 مارچ (اے پی پی) بنجائی وزیر ڈٹ بندی ، شونداری، اصلاحات و خصوصی گام گیج و نیشنل کمانڈ اینڈ آپریشن سینٹر(این سی او سی ) نا سروک اسدعمر پارینے کہ حکومت مچ آ ملک اٹی کورونا کیس آتیٹی پدریسہ کمتی نا سوب آن پابندی تے چٹفنگ نا پڑو کرینے۔ چارشنبے نادے آ این سی او سی ٹی وزیراعظم نا خصوصی کمکار قومی جان جوڑی ڈاکٹر فیصل سلطان تون اوار میڈیا حوال اٹی اوپارے کہ مچ آ ملک اٹی کورونا نا بابت غٹ پابندی تے چٹفنگانے، ولے ویکسین خلفنگ نا بابت پابندیک برقرار سلرہ۔ اوپارے کہ کورونا نا مثبت کیس آتا کچ اٹی کمتی نظر بننگ ءِ، ہسپتال اٹی بروک آ ناجوڑ آتا کچ اٹی ہم کمتی مسنے۔ اوپارے کہ پاکستان کورونا ءِ ہراوڑ ہینڈل کرے اونا مچ آ دنیا ٹی پبی ستاءِ کننگ انگ ءِ ۔ ملک اٹی 70 درسد بندغ آتا ویکسی نیشن پورو مسنے۔ اوپارےکہ پاکستان اٹ کورونا دین انا تالانی کم مننگ ءِ۔ کورونا غان پیش تمسا ہڑدے ئی زند انا کنڈآ ہُننگ اُن۔ اوپارے کہ کورونا دین اٹی اخس پابندی خلکوسن اوفتے چٹفنگ انگ ءِ۔ برام نا دود، مارکیٹ آتیا خلوک غٹ پابندی تے چٹفنگ اُن۔ اوالس ءِ خبڑدار کرے کہ کورونا داسکان پورو ڑاٹ چٹتنے، ویکسین خلفنگ نا پابندی برقرار سلک۔ اسد عمر پارے کہ این سی او سی نا پارت آتیا بھلو حداسسکان عمل کننگا، سوچ سمجھ اٹ ہڑدے ئی زند انا کنڈآ ہِننگ نا فیصلہ ءِ کرینن۔
